Sekretáriu Jerál Partidu União Democrática Timorense (UDT) Francisco David Xavier Carlos entrega bandeira UDT ba Pedro Gusmão dos Santos (oan husi saudozu Gilman A.Exposto dos Santos) iha sede Nasionál UDT, Palapasu. Imajen Tatoli/Ego Pereira

DILI, 27 novembru 2019 (TATOLI) – Vise-Prezidente no atuál Prezidente interinu Partidu União Demokratika (UDT), Rudolfo Aparício, hateten estrutura partidu inklui UDTista iha territóriu Timór, lakon líder másimu UDT, Gilman A. Exposto dos Santos, ne’ebé durante ne’e servisu nunka sura kolen.

“Ami lakon ami nia líder, aman no maun boot Gilman Exposto ne’ebé durante ne’e servisu maka’as hodi hakbesik-aan ba baze, ba ami nia UDTista sira, la hanoin kolen, la sura kolen, no sempre apoiu finanseira ba susesu partidu nian”, tenik Rudolfo Aparício durante fó omenajen ikus ba mate isin iha Sede Nasionál UDT Palapasu, kuarta ne’e.

Nia konta tuir Katak, partidu UDT hanesan mós partidu istóriku ida, lakon ona ninia líder másimu ida, saudozu Gilman ne’ebé dezde harii partidu ne’e iha 11 maiu 1974, ho prinsípiu demokrasia tanba hakarak atu prepara Timór ba ukun rasik-aan.

“Sira harii UDT hodi tau ezijénsia Estadu Portugál ba Timór nia ukun rasik-aan no konsege koliga ho FRETILIN iha 7 maiu 1975, atu lori Timór ba ukun rasik-aan no iha 12 novembru 1991, ne’ebé juventude UDTista hafalun-aan ho terus hodi envolve direta iha Masakre Santa Cruz”, nia akresenta.

Rudolfo rekoñese, matebian konsege envolve-aan iha klandestina hodi liberta rai doben Timor-Leste to’o tinan 1999.

Nia dehan tan, ho líder UDT nia esforsu inklui saudozu Gilman Exposto, maka partidu istóriku ne’e konsege manan kadeira rua iha Assembleia Konstituante hodi hakerek Konstituisaun Repúblika Demokrátika Timor-Leste (KRDTL) iha 2001 to’o 2002, no kontinua iha Parlamentu Nasionál (PN) iha Lejizlatura dahuluk iha tinan 2002 to’o 2005.

Nia subliña, ho lideransa Gilman Exposto iha 2010 to’o 2018, UDT konsege hetan asentu ho kadeira ida iha Parlamentu.

“Esforsu hirak ne’e tanba Prezidente UDT, Gilman Exposto nian, konta ho apoiu husi estrutura nasionál, munisipál, postu administrativu, suku no aldeia. Hanesan nia dehan beibeik ba estrutura katak, ita tenke esforsu maka’as hodi lori hikas partidu istóriku ida-ne’e atu tane ita rai no povu, liuliu serví povu ne’ebé sei hamlaha no hamrook”, nia dehan tan.

Nune’e, Rudolfo ejizi ba Estadu atu fó rekoñesimentu ba UDTista sira ne’ebé sofre ba rai ne’e desde 1975 to’o 1999, tanba sira mós sai vítima ba prossesu ukun rasik-aan.

Maski sente lakon fizikamente ema importante, iha partidu, maibé Rudolfo ho estrutura tomak fiar metin katak, estrutura sira sei kaer metin espíritu, korajen no aprosimasaun pasífika saudozu nian, hodi kontinua mehi no obra UDT nian ba prossesu libertasaun povu Timor-Leste iha futuru.

Iha fatin hanesan, Sekretáriu Jerál UDT, Francisco David Xavier Carlos, ne’ebé reprezenta estrutura nasionál, entrega bandeira UDT ba soudozu Gilman Exposto dos Santos ninia oan mane, Pedro Gusmão dos Santos atu hatudu Katak, maski saudozu husik ona mundu, maibé nia família boot sei hamutuk nafatin ho UDT hodi kontinua misaun partidu nian iha Timor-Leste.

“Ohin iha serinónia omenajen ikus nian, ha’u entrega bandeira UDT atu dehan katak, maski ami lakon ami nia maun, líder, no Prezidente Partidu husi ami leet, maibé família husi saudozu hamutuk nafatin ho ami hodi haboot no hamoris nafatin UDT iha nasaun ida-ne’e”, hateten Francisco.

Entretantu, iha okaziaun omenajen ikus ba maté isin ne’e, partispa husi estrutura UDT Nasionál, no kada munisípiu inklui Rejiaun Administrativa Espesiál Oecusse Ambeno (RAEOA) partisipa reprezentante na’in-rua.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here