Prezidente Tribunál Rekursu, Deolindo dos Santos. Imajen/Tatoli

DILI, 27 novembru 2019 (TATOLI)–Tribunál Rekursu (TR), husu orsamentu adisionál millaun $5 iha Orsamentu Jerál Estadu (OJE) 2020 nian.

Prezidente Tribunál Rekursu, Deolindo dos Santos, esplika proposta inisiál husi TR ne’e millaun $5, maibé ikus mai deside tan adisionál millaun $5 hamutuk millaun $10.

“Ami mós husu tan pedidu adisionál ba Parlamentu Nasionál. Ami espera Parlamentu sei aprova ami-nia orsamentu ne’e. Ami la husu osan boot. Ami husu proposta inisiál millaun $5, aumentu ho adisionál millaun $5. Osan ne’e ami bele ezekuta iha tinan oin mai”, Prezidente TR, Deolindo dos Santos, ba jornalista sira iha Katedrál Dili, Vila Verde, hafoin partisipa misa agradesementu ba Komemorasaun Loron Proklamasaun Independénsia ba dala-44 (28 novembru 1975-28 novembru 2019), kuarta ne’e.

Deolindo dehan osan adisionál ne’e husu bazeia ba nesesidade hanesan kria kondisaun di’ak ba juíz sira, ofisiál justisa no funsionáriu sira hotu tanba juíz balun laiha rezidénsia atu hela no mós nesesidade balun iha Tribunál Distritál Dili nian.

“Ita presiza kria kondisaun di’ak iha Tribunál–aumenta subsídiu balun ba juíz sira, ofisiál justisa no funsionáriu sira atu ema bele serbisu ho di’ak”, nia informa.

Deolindo hatutan prioridade prinsipál seluk iha 2020 mak fó formasaun ba juíz sira, ofisiál justisa no funsionáriu sira.

Entretantu, Prezidente TR ne’e akresenta, progresu ezekusaun orsamentu 2019 nian atinje ona pursentu 75.3.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here