Komandante Jerál Polísia Nasionál Timor-Leste (PNTL), Komisáriu Faustino da Costa. Imajen Tatoli/Eugénio Pereira

DILI, 27 novembru 2019 (TATOLI)-Komandu Polisia Nasionál Timor-Leste (PNTL) alerta ba grupu Uniaun Nasionál Juventude Maubere (UNIJMA), eis grupu CPD-RDTL, atu labele hasa’e bandeira RDTL iha fatin ketak ne’ebé la tama ba ajenda Estadu Timor-Leste nian hodi komemora loron Proklamasaun Independénsia ba dala-44 (28 novembru 1975-28 novembru 2019).

Komandante Jerál Polísia Nasionál Timor-Leste (PNTL), Komisáriu Faustino da Costa, husu atu grupu UNIJMA koopera ho autoridade seguransa no autoridade munisípiu, inklui komisaun organizadora hodi partisipa no hasa’e de’it bandeira iha kada munisipiu ne’ebé Estadu Timor-Leste maka organiza.

Faustino dehan, PNTL rasik simu ona karta husi Koordenadór UNIJMA atu hasa’e bandeira RDTL iha Munisípiu Aileu, Ainaro, Viqueque no Covalima, ne’ebé masa UNIJMA konsentra ba.

“Ita simu informasaun husu grupu UNIJMA hodi husu atu sira mós halo serimónia hasae bandeira iha munisípiu sira ne’ebé mensiona ona, mais PNTL husu atu lideransa sira atu koopera ho autoridade seguransa no autoridade munisípiu hodi selebra iha fatin ne’ebé governu maka organiza,”  hateten Komisáriu Faustino da Costa, ohin, liuhosi konferénsia imprensa iha Kuartél Jerál PNTL, Caicoli, Dili.

Nia dehan, se grupu sira ne’e lakohi koopera no uza forma oin-oin hodi hasa’e fali bandeira RDTL iha fatin ketak, PNTL sei atua tuir lei.

Iha munisípiu sira, Komandante Polisia Munisípiu sira simu proposta hosi UNIJMA no hakarak atu selebra loron proklamasaun ba iha ida-idak nia fatin ne’ebé sira iha. Tuir Konstituisaun RDTL autoriza katak ema hotu –hotu bele festeja loron nasionál sira Timor-Leste ninian no bele mós uza símbolu nasionál Timor nian ne’ebé legál.

“Karik iha organizasaun ka grupu balun tenta hakarak kria no halo sira nia selebrasaun ida ne’e iha fatin ida ne’ebé karik seidauk iha autorizasaun hosi governu husu ita boot sira koopera. Atu nune’e selebra hamutuk iha fatin ne’ebé governu indika,” nia afirma.

Nia dehan, kona-ba atividade hotu-hotu ne’ebé governu realiza iha kada munisípiu ema hotu- hotu partisipa no iha nivel munisípiu sei koloka seguransa ba postu administrativu sira.

Faustino dehan, selebrasaun ne’e rasik Xefe Estadu Francisco Guterres Lú Olo sei fó mensajen ba povu tomak.

Gil Fernandes Rekoñese PNTL Bandu UNIJMA

Hosi sorin seluk, Sekretáriu Jerál Grupu UNIJMA, Gil Fernandes informa, sira hato’o duni pedidu ba komandu polisia munisípiu sira, maibé parte PNTL bandu atu sira labele hasa’e bandeira iha fatin ketak.

Gil dehan, intensaun sira atu hasa’e bandeira RDTL iha sentru sira ne’ebé UNIJMA konsentra ba atu festeja selebrasaun loron proklamasaun independénsia 28 Novembru ba dala 44 ho dame hodi kontribui ba dezenvolvimentu.

Gil mós preokupa no lamenta iha Munisípiu Covalima nian PNTL ba sobu no hasai hotu bandeira riin ne’ebé parte membru UNIJMA mota ona hodi ka’er mós membru ida.

Gil hatutan, hosi grupu UNIJMA husu Aileu, Ainaro no Manufahi nian mós simu ona informasaun katak, PNTL bandu sira, maibé parte membru sira deklara sira kontinua selebra loron importante ne’e ho dame.

“Agora ba membru sira iha Aileu, Ainaro no Same atu selebra eventu ne’e sei iha prosesu nia laran hodi halo koordenasaun ho polisia, maibé hosi parte Manatuto, Baucau no Viqueque ami nia kooperasaun di’ak tebes ho polisia,” tenik nia.

Iha parte seluk, Gil dehan, membru UNIJMA sira iha parte Baucau no Viqueque hetan mós konvite hosi governu hodi partisipa selebrasaun hasa’e bandeira hamutuk ho autoridade lokál iha fatin ne’ebé estadu maka realiza.

Jornalista : Eugénio Pereira

Editór    : Francisco Simões

 

HAKEREK NO HATÁN

Please enter your comment!
Please enter your name here