Prezidente Parlamentu Nasionál, Arão Noé de Jesus da Costa Amaral no deputadu sira presta omenajen ba matebian Deputadu Gilman Exposto dos Santos. Imajen Tatoli/Tatoli Egas Cristóvão

DILI, 27 novembru 2019 (TATOLI)–Parlamentu Nasionál (PN) organiza sesaun solene hodi presta omenajen ikus ba matebian Gilman Assunção Exposto dos Santos, ne’ebé hakotu ona peregrinasaun hosi mundu.

Sesaun solene omenájen nia objetivu ba memória ne’ebé saudozu kontribui nu’udar deputadu iha Parlamentu Nasionál (PN). Saudozu husik mundu ho idade 63.

Xefe Bankada Parlamentár FRETILIN, Deputadu Aniceto Guterres, hato’o sentida kondolénsia ba família enlutada no partidu UDT nian.

Aniceto dehan, Parlamentu lakon nia polítiku ida no dirijente partidu polítiku ida. Partidu ida embora ki’ik maibé partidu ida iha istória.

Lee mós: Deputadu Gilman Exposto Hakotu Iis Iha HNGV

“Deputadu Gilman ema ida simples, umilde maibé sériu. Ema ida ho sensibilidade sosiál no umana aas”, intervensaun Xefe Bankada FRETILIN, Aniceto Guterres, iha última omenájen ba saudozu Gilman, iha plenária PN, kuarta ne’e.

Bankada FRETILIN akompaña ho orasaun atu Aman Maromak perdua no simu nia iha reinu lalehan.

Aleinde ne’e, reprezentante Bankada Parlamentár CNRT, Deputada Virgínia Ana Belo, hato’o mós sentidu kondolénsia kle’an família saudozu no partidu UDT nian.

“Ita hatene katak saudozu Gilman iha nia moris tomak dedika-an ba dezenvolvimentu sosiedade timorense, nu’udar ativista luta-na’in hodi hametin demokrasia iha ita-nia nasaun. Ho oportunidade ida-ne’e, bankada CNRT espresa kondolénsia profunda ba família no amigu ne’ebé lakon kompañeiru di’ak, simples no laran-luak”, espresa Deputada Bankada CNRT.

Purtantu, Reprezentante PLP, Noé da Silva Ximenes, hateten saudozu Gilman luta maka’as to’o UDT hetan fali asentu iha Parlamentu Nasionál.

“Ami hamutuk tinan ida iha Parlamentu Nasionál, saudozu hatudu ninia simplisidade, haraik-an. Ne’e merese duni atu ami bele banati tuir. Saudozu rasik prepara ona nia proposta hodi reforsa munisípiu sira-ne’ebé presiza hetan tulun Governu, maibé proposta hirak-ne’e sai de’it memória mai ami. Ami sente triste tanba lakon figura di’ak ida iha rai ida-ne’e”, Deputadu PLP ne’e akresenta.

Entretantu, Vise-Xefe Bankada Parlamentár KHUNTO, Antónia Verdial de Sousa, ho laran triste tanba deputadu Gilman husik kolega no família tomak.

“Saudozu fó kontribuisaun maka’as iha diskusaun Lei Antí Korrupsaun. Ami espera bele hetan naroman iha Nai nia kadunan”, nia katak.

Nune’e mós, Deputada UDT/FM, Isabel Maria Barreto Pereira Ximenes, hato’o nia sentidu kondolénsia ho tanis tanba matebian husik hela ninia espoza, oan na’in-neen (6) no bei-oan na’in 12.

“Lakon ami-nia aman no ami-nia matadalan, ne’ebé sempre fó hanoin ha’u iha fatin ida-ne’e. Adeus, adeus no adeus tiu Gilman”, deputada ne’e espresa ho sentimentu tristeza.

Xefe Bankada Partidu Demokrátiku, António da Conceição, hato’o sentidu kondolénsia kle’an ba família no oan-ki’ak sira.

Xefe Bankada PUDD, Deputadu António de Sá Benevides, lori partidu refere hakarak hato’o sentida kondolénsia ba família saudozu nian.

“Ha’u konsidera saudozu hanesan profesór polítika tanba ita-boot iha esperiénsia. Ha’u foin tama iha polítika”, Deputadu PUDD ne’e informa.

Sikun seluk, Prezidente Parlamentu Nasionál, Arão Noé de Jesus da Costa Amaral hateten sesaun solene hodi fó votu omenajen ba saudozu Gilman tanba durante ne’e nia (Gilman) hanesan deputadu titulár depois hanesan prezidente bankada ida molok ba haloot iha fatin ikus.

Hafoin sesaun solene, F-FDTL ne’ebé akompaña ho família lori mate-isin Prezidente UDT ba Igreja Motael hodi halo misa requiem. Hafoin ne’e, lori mate-isin ba hatuur iha fatin ikus, semitériu Becusi.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here