Sesaun plenária Parlamentu Nasionál. Imajen/TATOLI

DILI, 27 novembru 2020 (TATOLI)–Prezidente Parlamentu Nasionál, Arão Noé de Jesus da Costa Amaral, hateten atu redús orsamentu jerál Estadu (OJE) 2020, plénaria mak iha kompeténsia.

“Kuandu hatama mai Parlamentu ne’e, orsamentu nia númeru sei nafatin. Atu hatún ne’e só plenária mak deside iha espesialidade”, nia dehan ba jornalista sira, iha Parlamentu Nasionál, kuarta ne’e.

Nia argumenta, plenária nakloke atu halo redusaun ka aumenta maibé tenke liuhosi proposta ruma hosi deputadu sira.

“Agora kabe ba deputadu sira hakarak hatún entaun prepara proposta no mós ba deputadu sira hakarak aumenta”, nia esplika.

Prezidente Parlamentu Nasionál labele fó-sai númeru proposta tanba kompeténsia idak-idak nian iha plenária.

“Só proposta mak bele halo alterasaun tanba prosesu hotu tenke liuhosi proposta. Rejimentu hateten katak laiha proposta laiha debate”, Arão katak.

Prezidente PN ne’e salienta maski diskusaun tarde sei la fó impaktu ba implementasaun iha tinan oin, tanba esperiénsia tinan hirak liubá hatudu ona.

“Se atraza ita uza dua-désimu hodi sustenta sálariu no vensimentu”, nia afirma.

Proposta OJE 2020 ne’ebé Governu haruka ba Parlamentu Nasionál ho montante biliaun $1.950.

Antes ne’e, rezolusaun ne’ebé Aliansa Maioria ba Progresu (AMP) hasai liuhusi konferénsia nasionál ne’ebé hala’o iha Sentru Formasaun Tibar, 16 novembru, iha pontu 3 deside  katak AMP endosa planu asaun anuál no orsamentu ba tinan 2020, ne’ebé mak aprezenta husi portavóz AMP, nu’udar mós Primeiru-Ministru Governu Daualuk, ho observánsia ba: (a) komentáriu no sujestaun ne’ebé aprezenta obra husi kada responsável Komisaun Parlamentár (Komisaun A to’o G)  ba kada setór no /liña ministerál, inklui nosaun atu halo hikas ezersísiu hodi redús montante orsamentu jerál Estadu 2020.

(b) kustamentu ba planu asaun anuál, inklui define meta anuál nian tenke aprezenta duni husi instituisaun Estadu/liña ministeriál sira rasik.

(c) asegura kontinuidade no melloramentu sistema planeamentu no orsamentu 2020 ne’ebé orientadu ba rezultadu, iha ne’ebé aliñadu ho programa tinan lima Governu Daualuk, inklui aliñamentu ho liña orientasaun jerál ne’ebé aprezenta no endosa ona iha konferénsia nasionál daualuk AMP nian.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here