Diretór Servisu Saúde Munisípiu Lautem, Bernaldo Amaral Lopes. Imajen: Felicidade Ximenes

DILI,27 novembru 2019 (TATOLI)-Diretór Servisu Saúde Munisípiu Lautem, Bernaldo Amaral Lopes hateten katak atu haree ba kualidade saúde presiza rekizitu barak tanba atende ema barak.

“Kualidade prestasaun ne’ebé ami hasoru ne’e oioin de’it tanba ita hatene katak menus rekursu, menus materiál no mós hanesan atitude ita ema rasik ida ne’e mós kontribui ba atendimentu ne’ebé mak iha. Ha´u atu hateten de’it katak antes la’ós la iha kualidade ne’e, lae, maibé presiza hadi´a,” dehan Diretór Servisu Munisípiu Lautem Bernaldo Amaral Lopes ba jornalista sira bainhira ramata partisipa workshop disiminasaun inisiativu hadi´a kualidade saúde Timor-Leste iha Palasiu Sinzas, Caicoli, ohin.

Atu hadi´a kualidade ne’e, tuir Diretór  Bernaldo Amaral katak suporta husi nasionál no tau iha nia fatin ezemplu ema moras tenke transferénsia. Se fasilidade ida labele atende, entaun suporta ambulánsia tenke iha nia roda di’ak, mina mós tenke iha no motorista tenke iha para bele atende lalais nesesidade komunidade nian.

“Iha munisipiu Lautem ami halo esforsu másimu hodi fó atendimentu tuir posibilidade ne’ebé mak ami iha maibé ami iha munisipiu, ami la hamrik mesak maibé depende nafatin no suporta nafatin husi nasionál entaun suporta ne’ebé mak la dun másimu ami hakaas aan nafatin maibé tuir posibilidade ne’ebé mak munisípiu iha bele atende,” tenik diretór ne´e.

Nia haktuir, atendimentu iha munisípiu la´ós la la´o maibé enfrenta problema, dalaruma ai-moruk la iha, dalaruma transporte aat. Ezemplu, Munisipiu Lautem iha transporte ambulánsia avaria totál, multifunsaun lima maibé ida de´it mak sei funsiona no kondisaun la dun di’ak.

“Maibé, ami rona informasaun katak semana ida ne’e nia laran atu autorizasaun manutensaun, reparasaun no ami hatama ona pedidu hein semana oin karreta sira ne’e lori hotu mai nasionál hodi halo manutensaun hodi nune’e bele kondisaun di’ak para atende nesesidade komunidade nian”.

“Ami iha ambulánsia rua maibé provizioriamente mós aat hotu maibé Ministériu Saúde sei substitui lai ida ne’ebé mak aat hodi tékniku sira ba hadi´a atu bele funsiona fali,” nia reforsa.

Diretór Servisu Saúde Munisípiu Lautem, Bernaldo Amaral Lopes  informa, banhira sira transporte avaria, sira servisu hamutuk ho Postu Administradór Lautem no mós bombeirus sira para sira suporta sira hodi trasporta pasiente sira husi sentru saúde ba sentru saúde internamentu no mós ba iha Ospitál Referál Baucau.

Aleinde mós, moras ne’ebé mak rejistu aas liu iha Munisípiu lautem mak infesaun vias respiratóriu nomós diarea. “Maibé tanba agora besik udan monu rai ha’u hanoin diarea sei aas maibé ami-nia profisionál saúde sira mós fó promosaun, edukasaun saúde, oinsá atu prevene moras hirak ne’ebé mak mosu iha ita-nia leet,” nia dehan.

Notísia relevante:MS Estabelese Sentru Atendimentu Reklamasaun Ba Públiku

Jornalista : Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here