Diretór Jerál Água no Saneamentu (SAS), Gustavo da Cruz

DILI, 27 novembru 2019 (TATOLI)–Diretór Jerál Diresaun Água no Saneamentu, Gustavo da Cruz, hateten planu Governu nian atu fornese bee ba komunidade, daudaun ne’e iha hela estudu viabilidade rua hosi konsultór Koreia no Tailándia. Estudu rua ne’e, ida haree ba bee rai-okos no ida seluk haree ba bee rai-leten.

Nia dehan, kontratu ne’ebé Governu halo ho konsultór rua ne’e durante fulan-neen nia laran.

“Kona-ba rekursu bee atu bele fornese ba komunidade hotu, agora daudaun ita iha estudu rua. Ida, konsultór hosi Koreia mak halo estudu viabilidade ba mota Gleno no Railaco (Ermera). Ida fali mak estudu pre-viabilidade ba bee rai-okos nian. Ne’e konsultór ida hosi Tailándia mak sei hala’o. Estudu rua ne’e sei finaliza iha fevereiru tinan oin,” diretór ne’e dehan ba Agência Tatoli iha nia knaar fatin, Colmera, kuarta ne’e.

Lee mós: Governu Planeia Taka Mota Railaco-Gleno Lori Bee Mai Dili

Tanba ne’e, nia informa, bainhira estudu ne’e nia rezultadu sai loloos ona, Governu sei hala’o investimentu hodi hasa’e reseita nune’e bele kontribui ba dezenvolvimentu.

“Estudu ida Railaco no Gleno nian ne’e viável. Ita sei halo barajen bee iha Railaco no Gleno nune’e bele lori mai Dili. Ida-ne’e mak ita-nia parte rekursu ne’ebé ita presiza halo oinsá para bele hasa’e reseita” Gustavo tenik.

Nia hatutan, konsultór rua ne’e submete ona relatóriu hosi estudu refere.

“Daudaun ne’e, provizoriamente, konsultór rua ne’e submete ona segundu relatóriu. Primeiru, sira hatama relatóriu prelimináriu. Relatóriu ne’ebé sira hatama ne’e kona-ba teste jeo-tékniku nian. Kuaze iha relatóriu ne’e indika katak pursentu 50-50, katak viável ka la viável. Ita atu uza modelu barajen saida, ida-ne’e sira sei halo estudu hela tanba ita-nia rai ne’e mak presiza halo estudu ne’ebé kle’an,” tenik Gustavo.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here