Entidade importante sira nasaun nian partisipa iha selebrasaun misa agradesementu ba Loron Proklamasaun Independénsia ba dala 44, iha Katedrál Dili. Imajen Arminda Fonseca

DILI, 27 novembru (TATOLI)–Pároku Parókia  Nossa Senhora Imaculada da Conceição Dili, Pe. José António hateten ukun-na’in labele ukun povu halo tuir hakarak maibé ukun ho karidade no domin nia laran.

“Ukun-na’in tenke matenek kaer metin moris hakmatek ba nia entidade no labele ukun povu halo tuir hakarak. Se lae nakonu ho injustisa no violénsia hodi buka rikusoin nune’e bele prejudika reinu ida-ne’e sei monu ba ema seluk nia liman,” Amu José dehan bainhira prejide selebrasaun misa agradesimentu ba komemorasaun Loron Proklamasaun Independénsia ba dala 44 (28 novembru 1975-28 novembru 2019), iha Katedrál Dili, Vila Verde, kuarta ne’e.

Tuir Nai-Lulik ne’e katak ukun-na’in sira presiza ukun ho Kristu Liurai nia ukun, ukun ho lialoos, ukun ho domin no dame.

Nia hatutan ukun-na’in sira labele rai ódiu ba ema seluk ne’ebé la sala basá Nia ne’ebé iha leten aas la simu ema loko-an no ema ne’ebé vingadór.

“Tenke kaer metin moris hakmatek ba nia sosiedade. Ukun-na’in ne’ebé matenek sei lori grasa ba nasaun,” Amu José haklaken.

Misa agradesementu ho tema: “Mai ita hotu hametin unidade no estabilidade hodi haburas liután dezenvolvimentu” ne’e organiza hosi VIII Governu Konstitusionál.

Misa refere partisipa husi Espoza Prezidente Repúblika, Cidália Nobre Guterres, Espoza Primeiru-Ministru, Isabel Ferreira, Prezidente Parlamentu Nasionál, Arão Noé de Jesus da Costa Amaral ho nia espoza, Majór Jenerál Lere Anan Timur ho nia espoza, Prezidente Tribunál Rekursu, Deolindo dos Santos ho nia espoza no mós entidade importante sira seluk.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here