Diretór ONG Saude Ba Ema Hotu (SABEH), André Belo. Imajen Tatoli/Felicidade Ximenes

DILI, 26 novembru 2019 (TATOLI)—Ha’u-nia lema moris nian mak “we belong to people” katak valór moris ne’ebé aas liu mak dedika totalmente no onestidade ho matenek, ba sira ne’ebé presiza liu bele fó vantajen di’ak ba komunidade liuliu ema sira ne’ebé moris iha ita-nia leet.

Hori haú sei ki´ik no hori haú sei labarik, haú só haree de’it doutór sira serve ema moras sira iha ospitál. Dalaruma, ha’u haree-hetan doutór ida wainhira mai iha haú-nia hodi fó konsulta ba ha’u-nia aman ne’ebé moras.

Tempu ne’ebá haree de’it doutór sira. Maibé, seidauk iha mehi katak sai doutór. Depois de eskola hotu tiha, atu ba eskola medisina ne’e hanesan buat ida ne’ebé mosu derepenti de’it atu sai doutór.

Onestu de’it! Laiha buat ida mak inspira no fó inspirasaun ba ha’u. Maibé, uluk ha’u kiik-oan, ha’u-nia aman moras, ha’u tuur iha ha’u-nia aman nia sorin no madre ida sai hanesan enfermeira hodi haree  ha’u-nia aman. Iha ha’u-nia laran mosu hanoin, oh, ema moras ne’e presiza doutór no  presiza enfermeiru.

Iha biban ne’ebá, ha’u haree no fihir be fihir. Ha’u laiha mehi atu loron ida sai doutór. Hafoin akaba tiha eskola sekundária, mehi atu ba eskola medisina nian ne’e, hanesan buat ida ne’ebé mosu derrepente de’it.

Bainhira ita ukun-aan tiha, ema loke bolsa estudu, ha’u mós aplay  (konkorre) no ha’u liu hodi ba eskola medisina nian iha nasaun viziñu Indonézia. Ha’u hakru´uk ba ha’u-nia prinsípiu moris; “Ema di’ak mai ha’u entaun tempu ona para ha’u halo di’ak ba ema seluk ha’u-nia profisaun ho profisionál no tuir ha’u-nia matenek rasik”.

Ha’u-nia motto (lema) iha ha’u-nia moris mak we belong to people katak valór moris ne’ebé aas liu mak dedika totalmente no onestidade ho matenek, ba sira ne’ebé presiza liu bele fó vantajen di’ak ba komunidade liuliu ema sira ne’ebé moris iha ita-nia leet.

Ha’u  hahú atu ba eskola iha Indonézia iha tinan 2003-2008. Tanba ha’u iha ne’ebá simu graduasaun ba dala rua. Graduasaun dahuluk mak sarjana kedokteraan no hetan gelar dokter ne’e ramata  iha loron 24  fulan Novembru 2010. Graduasaun daruak mak prátika ospitál sira depois fulan neen (6) hotu, hafoin  ezame hodi  gradua médiku nian.

Maromak tulun! Ha’u ramata eskola ba medisina iha Fakuldade Medisina iha Universidade Padjadjaran  Bandung, Jawa Barat (oeste) iha tinan 2011.Ha’u mai fali Timór hodi hetan servisu voluntáriu nu’udar doutór emerjénsia iha Hospitál Nasionál Guido Valadares hodi halo servisu voluntáriu nu’udar doutór ba  komunidade iha área Liquiça no Aileu.

Iha tinan-2012, ha’u servisu nu’udar Pontu Fokál iha Globál ba Treatment outcomes of MDR-tuberculosis, Malaria no programa HIV no Night Shift iha Departamentu Emerjénsia iha Hospitál Nasionál Guido Valadares. Alende ne’e, ha’u mós nu’udar  treinadór Spite TB no MDR, TB iha Globál Fund, Dili, ba doutór timoroan sira iha munísipiu hotu.

Iha tinan 2013 no tinan 2014 nia klaran, ha’u nu’udar diretór iha Departamentu Unidade Emerjénsia Hospitál Nasionál Guido Valadares (HNGV), primeiru bolu nu’udar doutór ba Very Very Important Person (VVIP). Iha fulan Agostu tinan 2014 to’o  2017,  nu’udar doutór privadu ba  Prezidente Repúblika Taur Matan Ruak ne’ebé agora daudaun Primeiru-Ministru ba oitavu Governu nian no mós doutór Primariu Veteranu.

Iha tinan 2018  to’o agora, ha’u servisu nu’udar  doutór voluntáriu ba área balun iha Timor-Leste iha Organizasaun Naun Governamentál (ONG) Saude Ba Ema Hotuh (SABEH) hanesan Diretór Ezekutivu.

Ema  barak mak sai  doutór servisu iha ospitál hetan fatin ne’ebé di’ak maibé ha’u-nia karreira, lae. Ha’u gosta liu hili fatin rurál ne’ebé mak besik komunidade ne’ebé dook husi fasilidade saúde. Ha’u gosta liu doutór ida ne’ebé mak besik no moris hamutuk ho komunidade.

Tanbasá? Tanba ita Timór adapta saúde rua mak (1) Saúde Ospitalár no (2) Saúde Komunitária Iha Timór, ema barak mak hakarak ba ospitál. Maibé, dalabarak ita ema ne’e ajuda barak liu ne’e iha komunidade. Ha’u hakarak hala’o ne’e, tuir ha’u-nia mehi, oinsá sai doutór ne’ebé di’ak no oinsá atu sai médiku ne’ebé  di’ak iha komunidade nia leet, hodi hadi’a komunidade nia presiza iha área rurál ne’ebá.

Durante hala’o knaar, ema ne’ebé inspira ha’u mak ha’u-nia inan ne’ebé hahoris ha’u. Daruak mak dr. Rui Maria de Araújo tanba nia hanesan ema ida ne’ebé haraik-aan. Ita haree hanesan nia lideransa ba jestór, ema ne’e di’ak tebes. Nia atu ba halibur hamutuk ema boot, atu halibur ho ema hanesan baibain, nia di’ak tebes. Tanba ne’e mak ha’u hili nia hanesan lider ida ne’ebé inspira ha’u atu moris banati.

Durante hala’o knaar, ha’u hetan no hasoru dezafiu oin-oin. Dezafiu ne’ebé ha’u hetan iha terrenu, liuliu iha Saúde Ba Ema Hotu (SABEH) dezafiu barak mak ha’u hasoru. Dahuluk, la fasil atu mobiliza rekursu ne’ebé iha ba ita-nia komunidade. Daruak, la fasil atu implementa mehi ne’ebé iha atu ba ema seluk nia di’ak.

Se mehi ne’ebé halo ita mós tenke prontu atu husi ita-nia karreira ne’ebé iha no husik mehi sira ne’ebé mak iha. Ita-nia mehi maske di’ak ba nasaun ida ne’e no di’ak ba  ema hotu-hotu maibé dalaruma tanba pesoál ne’ebé ema hakarak. Maibé dalaruma sente ladun di’ak maibé inportante mak lalika hakiduk ba kotuk. Se sente ba di’ak, halo de´it kna’ar ne’ebá, bainhira ema seluk simu no ema seluk sente nia  vantajen.

Hala’o buat ne’ebé ó hakarak. Halo tuir buat ne’ebé mak ó hatene no onestidade. Tanba ita hotu hatene katak buat ne’ebé  halo bele fó ninia vantajen ba ema seluk, ida ne’e mak importante. Tanba ita ema moris nu’udar sosiedade, ita la’ós moris iha ema individuál. Se ita moris iha sosiedade, oinsá ita-nia moris ne’e bele fó vantajen no fó valór ne’ebé mak di’ak.

Ida ne’e, valór ne’ebé aas liu banhira  nu’udar ema ne’ebé intelektuál. Se ha’u hakarak eskola matenek, eskola boot, hakarak buka servisu atu hadi’a de’it ha’u-nia aan, ha’u mak sai di’ak de’it, ida ne’e hanoin ida ne’ebé ladun di’ak. Maibé, oinsá ita uza matenek ne’ebé iha, oinsá ita uza buat ne’ebé ita hetan, para ema hotu bele moris di’ak.

Eh, hein lai, ha’u haluha tiha! Ha’u-nia naran André Pereira Belo. Ha’u-nia uma-lisan naran  Afagua, Aldeia Afagua, Suku Wailili, Postu Administrativu Baucau Vila, Munisípiu Baucau. Ha’u moris iha Wailili, iha 3 Dezembru 1980. Ha’u- nia aman naran Tomas Pereira Belo. Ha’u-nia inan Ana Maria Piedade. Ha’u-nia maun-alin hamutuk na’in lima (mane 3, feto 2). Dadaun ne’e, ha’u iha oan rua.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here