AILEU, 26 novembru 2019 (TATOLI)-Sentru Treinamentu Rekursu Aileu (STRA) tulun ona solár painel ba uma-kain 85 iha Postu Administrativu Lequidoe, Munisípiu Aileu.
“Ami hanesan ONG lokál ida husi Munisípiu Aileu ne’e, ami hala’o programa fahe panel solár ba komunidade iha suku Manukasa aldeia lima no ami fornese ona solár panel uma-kain ualu nolu resin lima iha Postu Administrativu Lequidoe rasik no ami fornese ona solár panel ba uma-kain 85,” informa Koordenora STRA, Natalia da Conceição ba Ajénsia TATOLI, iha Kampu Sabraka Laran, Aileu Vila, ohin.
Koordenadora ne´e relata, ONG lokál ne´ebé nia lidera ne´e apoia husi PNUD (Programa Nasaun Unida ba Dezenvolvimentu, sigla inglés). Enkuantu, asuntu edukasaun hetan apoiu husi Asia Foundation no Friends of Aileu.
Nia relata mós katak ezisténsia ONG ne´e dezde 2005 no oferese formasaun ba foinsa´e sira iha área komputadór. Sentru ne´e rasik kompleta ho biblioteka. “Daudaun ne’e husi Xanana Reading room fó treinementu atu oinsá instala internet iha biblioteka rasik”.
STRA, tuir Koordenadora Natalia da Conceição, kapasita ona joven Aileu-oan na´in 100 no husi númeru ne´e balun hetan ona empregu hanesan Administrasaun Munisípiu Aileu, inklui fatin seluk tan.
Nia dehan, daudaun ne’e sentru ne’ebé maka nia lidera hetan fiar husi INAP (Institutu Nasionál ba Administrasaun Públika) atu halo treinamentu ba funsionariu ba munisipiu Aileu nian iha área komputadór.
Iha parte seluk STRA oferese formasaun ba foinsa´e sira, ONG ne´e mós halo servisu iha área agrikultura nian hanesan reflorestasaun. “Ami iha iha rekursu 150 ne’ebe maka bele ajuda halo servisu iha área reflorestasaun ninian,” nia haktuir.
Husi programa reflorestasaun ninian, Koordenadora STRA, Natalina da Conceição haktuir katak sira halo ona reflorestasaun halo reflorestasaun iha Postu Administrativo Lequidoe, Suku Manukasa ba rai hektár sanulu hamutuk ho komunidade atu proteje bee-matan sira.
Nia dehan, la’ós ne’e de’it maka STRA realiza maibé halo mós programa balun liga ho área edukasaun nian hanesan realiza kompetisaun leitura ba estudante husi eskola Aileu inklui eskola referénsia husi munisípiu sanulu.
“Tanba ne’e programa sira ne’ebé maka Sentru Treinamentu Rekursu Aileu iha, nu´udar programa anuál entaun sei kontinua nafatin tanba di´ak no hetan apoiu husi parseiru barak,” konklui Koordenadora STRA.
Jornalista: Natalino Costa
Editór : Rafy Belo
