Prezidente Repúblika, Francisco Guterres Lú Olo. Imajen Tatoli/António Gonçalves

DILI, 26 novembru 2019 (TATOLI) – Prezidente Repúblika (PR), Francisco Guterres Lú Olo promulga ona Dekretu Parlamentu Nasional nº 10/V, Segunda Alterasaun ba Lei n.º 13/2005,  2  setembru, Lei Atividade Petrolífera.

“Ha’u husu ba Tribunál Rekursu atu halo fiskalizasaun preventiva konstitusionalidade ba Dekretu  Parlamentu Nasionál ida ne’e, maibé instánsia ne’e fó hatene mai ha’u katak la iha buat ida hasoru Konstituisaun, liuhusi akórdaun iha loron 15 novembru 2019”, tenik PR Lú Olo liuhosi konferénsia imprensa iha Palásiu Prezidensiál, Bairro Pité, tersa ne’e.

Razaun PR promulga Dekretu ne’e, tanba konsidera la hetan inkonstitusionalidade ona iha akórdaun loron 27 Agostu 2019 husi Tribunal Rekursu (TR), tanba Parlamentu Nasionál (PN) halo ona alterasaun no hato’o ona Dekretu foun ida ba atividade petrolífera.

Liuhusi Dekretu  PN nº 10/V, deputadu sira halo proposta alterasaun daruak ba Lei ne’e no hakarak atu hasai regra kona-ba prosedimentu parlamentár no governamentál ne’ebé prevee iha artigu ne’ebé aplika ba investimentu diretu fundu nian iha operasaun petrolífera.

Enkuantu, Dekretu  Parlamentu Nasional  nº 12/V hasees ona  husi inkonstitusionalidade tanba aprova fali redasaun foun ida husi Lei Atividade Petrolífera, ne’ebé determina katak investimentu diretu fundu nian iha atividade petrolífera sei aplika tuir Lei Fundu Petrolífera. Nune’e, lei ne’e maka sei regula tomak operasaun petrolífera.

“Redasaun foun  ba nº 6 artigu 22º Lei Atividade Petrolífera ne’ebé señores Deputadu sira aprova no hato’o, fó dalan ona atu investimentu iha operasaun petrolífera hatuir regra investimentu ne’ebé prevee tiha ona  iha Lei Fundu Petrolífera”, nia subliña.

Xefe Estadu hatutan: “Nune’e, haree ba dalan legál ne’ebé estabelese ona iha lei ne’e,  investimentu iha operasaun petrolífera no mós investimentu diretu sira seluk husi Fundu Petrolífera tenke aprezenta tinan-tinan ba Parlamentu nu’udar parte polítika investimentu Fundu nian no proposta distribuisaun karteira investimentu iha klase ativu ne’ebé pertense ba, maibé labele hasai osan liu porsentu lima husi valór Fundu Petrolíferu nian”.

Nune’e, Lei Fundu Petrolíferu maka define nafatin prosedimentu legál ne’ebé determina  oinsá uza osan husi fundu ne’e, nu’udar rezerva obrigatória.

“Katak ita tenke tau matan atu osan labele mohu, atu uza ho justu no igualitáriu no haree ba interese nasionál. Buat sira ne’e hotu maka prinsípiu no regra konstitusionál ne’ebé kesi metin lejizladór sira tuir Konstituisaun Repúblika haruka”, PR esplika.

Liuhosi biban ne’e, Xefe Estadu apelu ba Povu no Deputadu sira atu nafatin defende no promove fundu úniku ne’ebé Timor-Leste iha, ne’ebé mai husi esplorasaun rekursu naturál, minarai no gás, tanba rekursu hirak ne’e sei  maran loron ruma.

“Ita tenke uza Fundu Petrolíferu ho polítika no jestaun ida ne’ebé di’ak atu ita bele hetan rendimentu ba bebeik”, nia akresenta.

Nia mós apelu ba membru Parlamentu sira nu’udar lejiszladór, atu halo tuir nafatin Konstituisaun Repúblika bainhira aprova lei sira kona-ba  finansiamentu ka investimentu husi Fundu Petrolíferu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here