Sesaun plenária Parlamentu Nasionál. Imajen/TATOLI

DILI, 26 novembru 2019 (TATOLI)–Parlamentu Nasionál (PN), adia tan debate Orsamentu Jerál Estadu (OJE) 2020 ba semana oin, 2 dezembru.

Desizaun adiamentu ne’e hasai hafoin reuniaun líder bankada iha sala konferénsia Parlamentu Nasionál, ohin.

Vise-Prezidente Parlamentu Nasionál, Maria Angelina Sarmento, hateten razaun adia debate orsamentu tanba semana ne’e deputadu sira partisipa serimónia fúnebre ba Deputadu Bankada UDT, Gilman Exposto dos Santos nian.

Razaun seluk, nia esplika, tanba iha kinta (28 novembru) Selebrasaun Proklamasaun Independénsia RDTL ba dala 44, entaun debate orsamentu tenke adia ba fulan-dezembru.

Lee mós: Diskusaun  no Votasaun Jeneralidade OJE 2020 Adia ba Aban

“Tan ne’e mak ita suspende nafatin plenária no deputadu sira hanoin katak viável liu ita hahú debate iha segunda, 2 dezembru”, nia dehan ba jornalista sira hafoin reuniaun líder bankada.

Deputada ne’e argumenta, tuir rejimentu Parlamentu Nasionál, bainhira akontese ona debate tenke la’o ho konsekutivu. Katak, labele para iha dalan klaran kuandu prosesu debate la’o ona. Tan ne’e mak líder bankada sira konkorda adia debate refere.

Entretantu, Sekretáriu Estadu Komunikasaun Sosiál, Merício Akara, reprezenta VIII Governu Konstitusionál partisipa reuniaun líder bankada sira iha Parlamentu Nasionál, esplika Governu laiha problema ho mudansa debate OJE.

“Ohin, ha’u mós informa katak Governu laiha problema ho mudansa debate orsamentu. Governu prontu iha kualker data”, Merício haklaken.

Tuir ajenda ne’ebé iha, Parlamentu Nasionál (PN) sei halo diskusaun no votasaun jeneralidade ba Proposta Lei no. 8/V (2.a), Orsamentu Jerál Estadu (OJE) 2020 durante loron tolu nia laran, hahú 25-27 novembru, maibé tanba razaun Xefe Bankada UDT/FM, Gilman Exposto dos Santos hakotu iis iha horsehik dadér, diskusaun ne’e adia fali ba loron ohin (26/11). Infelizmente, ohin la konsege realiza tanba deputadu sira partisipa fúnebre deputadu Gilman Exposto dos Santos no asuntu seluk tan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here