Administradór João Tilman do Rêgo hamutuk ho Komandante Polísia Munisípiu Aileu, Superintendente Xefe Polísia, Jorge Monteiro observa hela estante sira iha feira lokál. Imajen: Natalino Costa

DILI, 26 Novembru 2019 (TATOLI)-Munisípiu Aileu, ohin, ofisialmente halo abertura ba feira lokál, iha ámbitu komemorasaun loron proklamasun 28 Novembru ba dala 44, hodi promove produtu lokál, artezanatu, kostura no seluk tan ne´ebé sai hanesan poténsia munisípiu nian.

“Ba tinan ne´e (2019), iha grupu rua nulu resin hitu maka partisipa,” informa Xefe Komisaun Organizadora (KO), Natalia Conceiçaõ ba Ajénsia TATOLI, iha Kampu Sabraka Laran, Aileu vila, ohin.

Tuir Xefe KO ne´e katak orsamentu destinadu ba feira lokál ne´e hamutuk dólar 2.620 USD, apoiu mós husi Friends of Aileu.

Feira ne’e hala’o loron tolu hahú husi loron  26  no sei ensera iha 28 Novembru.   Feira lokál ne´e partisipa husi Postu Administrativu Aileu Vila no Postu Administrativu  Remexio enkuantu Postu Administrativu  Laulara no Lequidoe hetan konvite maibé la konsege partisipa. Ohin, iha abertura feira lokál ne´e, iha mós sertame ba estudante sira.

Iha fatin hanesan, Administradór Munisípiu Aileu, João Tilman do Rêgo  hateten katak  feira ne’e realiza ho objetivu prinsipál komemora 28 novembru ba dala 44 hodi fó onra ba maluk mártir sira ne’ebé  fó sira-nia vida ba luta  hodi hetan independénsia.

Nune’e mós, Komadante Polísia Munisípiu Aileu, Superintidente Xefe Polísia, Jorge Monteiro akresenta feira nu´udar parte ida atu komemora 28 Novembru, Proklamasaun Independénsia nian tanba ne´e husu ba komunidade aproveita másimu feira ne’e ho di´ak .

Kona-ba seguransa, Komadante Munisípiu Aileu ne’e garante katak komemorasaun 28 Novembru seguransa la’o di´ak, laiha problema.

Entretantu, feira lokál ne´e aberta husi administradór no komadante Polísia Nasionál Timor-Leste (PNTL), Munisípiu Aileu no partisipa mós iha eventu ne´e mak komunidade no estudante sira.

Notísia relevante:Aileu Realiza Feira, Halai Maratona No Orden Unida Komemora 28 Novembru

Jornalista: Natalino Costa

Editór     : Rafy Belo

HAKEREK NO HATÁN

Please enter your comment!
Please enter your name here