Komandante PNTL, Munisípiu Aileu, Superintendente Jorge Monteiro. Imajen/PNTL

AILEU, 26 novembru 2019, (TATOLI)-Komandante Polísia Nasionál Timor-Leste (PNTL), Komandu Munisípiu Aileu, Superintendenti Polísia, Jorge Monteiro, hateten Komando Polísia Aileu sei menus rekursu umanu hodi fó seguransa di’ak liután ba komunidade iha munisípiu ne´e.

Em termos de rekursu ami menus tebes tanba daudaun ne ami iha de’it pesoál na´in 126. Ne’ebé, presiza aumenta atu nune’e bele iha balansu tanba tuir standar (padraun) internasionál katak polísia ida bele asegura seguransa komunidade atus rua, maibé ho total komunidade Aileu hamutuk 54.676 ne’e haree ba númeru ami nian ne’e polísia ida bele asegura seguransa komunidade to’o atus lima. Ne’ebé, seida’uk iha balansu,” hateten Komandante Jorge Monteiro ba TATOLI iha nia kna’ar fatin Komandu Polísia Munisípiu Aileu, ohin.

Tuir Kalkulasaun bazea ba padraun internasionál polísia ida asegura ema na´in 200, ho rekursu ne´ebé komandu Munisípiu Aileu iha hamutuk ema 126, ne´e ho totál populasaun Aileu hamutuk 54.676 ne´e bainhira halo divizaun rezulta katak pesoál polísia ida asegura ema na´in 433 husi totál populasaun mensionadu.

Maske menus rekursu umanu maibé lideransa másima komando Polísia Munisípiu Aileu ne’e kompromete nafatin atu garante seguransa di’ak ba populasaun Aileu.

Kona-ba fasilidade, komandante ho deviza ai-funan rua ne’e dehan, problema sira ne’e tama iha planu Komando Jéral PNTL nian atu oinsá asegura rekursu, ekipamentu ne’ebé sufisiente ba iha komando PNTL nível munisípiu sira hodi bele tulun no fasilita servisu.

“Kona-ba rádiu headset nian no rádiu base nian tantu eskuadra polísia Lequidoe, Laulara, Remexio no Aileu vila ami laiha problema. Nune’e mós kona-ba kombustível ami laiha problema, ami mina ne’e iha hela de’it no restu tan ne’e parese ami besik ou dala ruma ami hatene poupa, ha’u tenki koalia onestu”, afirma Jorge Monteiro.

Jornalista : Antónia Gusmão

Editór       : Rafy Belo

HAKEREK NO HATÁN

Please enter your comment!
Please enter your name here