Koordenadór Gabinete Jurídiku Konferénsia Episkopál Timoroan, Padre Júlio Crispim Belo. Imajen/Espesiál

DILI, 26 novembru 2019 (TATOLI) – Koordenadór Gabinete Jurídiku Konferénsia Episkopál Timoroan, Padre Júlio Crispim Belo, konsidera dalan atu forma Governu foun ne’ebé seidauk ramata mandatu tinan lima maka Reforma ka Remodela.

Jurista ne’e hato’o ninia ponto de vista tuir lei, relasiona ho Konferénsia Nasionál daruak Koligasaun Partidária Aliansa Mudansa ba Progresu (AMP) iha sábadu (16/11), ne’ebé desizaun ikus hamosu Rezolusaun númeru 2/2019 no afirma pontu importante ualu, ne’ebé pontu dahituk hateten AMP konsidera nosaun remodelasaun hosi VIII Govemu Konstitusionál, hodi responde ba nesessidade dezenvolvimentu nasaun nian, liuliu kontribui ba hadia dezempeñu governu nian.

Tuir Padre Júlio, konseitu Reforma ka Remodela hanesan termu rua diferente ho raíz, kauza, konsekuénsia no ninia implikasaun diferente ba entendimentu polítiku, jurídiku, no konstitusionál.

“Reforma Governu nu’udár konseitu polítiku, jurídiku, no konstitusionál ne’ebé ligadu ba Governu ninia formasaun (art. 106.º KRDTL). Signifika, Governu atuál ninia formasaun ladún ideál no efetivu, ne’e duni halo fali formasaun foun ka reforma ba Governu ne’ebé bele ideál no efetivu liu, hodi atinji Estadu ninia objetivu sira ne’ebé identifikadu nia realizasaun ba tinan lima nia laran”, tenik jurista ne’e ba Agência Tatoli, iha Institutu Superiór Filozofia no Teolojia (ISFIT) Dom Jaime Garcia Goulart, Fatumeta, tersa ne’e.

Nia dehan, bainhira Reforma Governu, bele mós hasoru Demisaun Governu (art. 112.º KRDTL), katak Primeiru-Ministru (PM) sei tun no Governu sei monu, hodi hahú halo fali formasaun foun ba Governu foun (bele indijita fali de’it Xefe Governu tuan) no propoin fali ninia membru governu foun, depende ba aliansa ne’ebé forma Governu, ho implikasaun ba kriasaun lei orgánika foun.

Alende ne’e, nia hatutan, Remodelasaun Governu nu’udár konseitu polítiku, la’ós konseitu jurídiku no konstitusionál ne’ebé ligadu ba Governu ninia organizasaun ka estruturasaun durante mandatu konstitusionál.

“Signifika, Governu atuál ninia organizasaun no estruturasaun la ideál ka la efetivu loloos, ne’e duni buka atu Remodela, katak organiza fali (reorganiza) ka halo fali estrutura (reestrutura) ne’ebé ideál no efetivu liu hodi atinji Estadu nia objetivu sira ne’ebé identifikadu nia realizasaun ba tinan lima nia laran”, akresenta Amu Júlio.

Nia subliña, ba situasaun Remodelasaun, PM bele nafatin, signifika Governu VIII nafatin, maibé reorganiza ka reestrutura, no muda membru governu sira seluk, depende ba AMP no sei implika alterasaun ba lei orgánika ein vigór.

Dosente Direitu ne’e esplika, Konstituisaun la ko’alia kona-ba Remodelasaun Governu, maibé ko’alia de’it kona-ba Demisaun Governu (art. 112.º KRDTL).

Nia dehan, Demisaun Governu implika kondisaun hanesan hahú lejizlatura foun, ne’ebé rezulta husi Eleisaun Jerál ka Eleisaun Antesipada (EA), Prezidente Repúblika (PR) aseita pedidu demisaun ne’ebé aprezenta husi PM.

Nune’e mós, PM mate ka impossibilidade fízika permanente, Parlamentu Nasionál (PN) rejeita programa Governu dala rua tutuir malu, PN la aprova votu konfiansa ba Governu no PN aprova Mosaun Sensura ho maioria absoluta.

Tuir Vise-Dekanu Fakuldade Direitu Universidade Nasionál Timor Lorosa’e (UNTL), realidade atuál iha Timor-Leste hatudu katak, pontu dahuluk husi artigu 112 bele akontese de’it liuhosi EA, maibé EA sei la akontese bainhira AMP sólidu iha Parlamentu no la vota kontra Orsamentu Jerál Estadu (OJE) 2020, nune’e hein to’o Eleisaun Jerál 2023.

Enkuantu tuir Amo Júlio, alínea tuir mai mós sei la akontese, tanba PM sei la aprezenta ninia pedidu demisaun ba PR, tanba atu to’o PM la’ós fásil, maski partidu PLP ne’ebé tama iha aliansa ne’ebé kaer ukun ho de’it kadeira ualu maibé bele to’o PM, hanesan rezultadu espetakulár husi EA 2018.

Tuir mai, alínea tolu mós sei la akontese, tanba PM saúde di’ak hela no alínea seluk mós sei la akontese, tanba programa Governu pasa tiha ona iha PN iha 2018.

Nune’e mós, jurista ne’e observa, alínea tuir mai mós sei la akontese, tanba Governu sei la husu votu konfiansa ba PN, tanba bainhira husu mós, AMP sólidu no Governu sei hetan nafatin konfiansa, katak bele akontese Demisaun Governu, Karik AMP iha PN la sólidu (deputadu AMP balun vota kontra).  

Nia esplika, ikus liu hosi alínea hosi artigu 112 mós sei la akontese kona-ba Demisaun Governu, tanba deputadu AMP sei sólidu no laiha inisiativa husi deputadu Bankada Governu rasik atu hatama Mossaun Sensura ba Governu ninia ezekusaun programa sira, maski deputadu husi Bankada Opozisaun maka hatama Mosaun Sensura mós sei la hetan votu maioria absoluta, tanba Bankada Opozisaun sira nia deputadu la to’o maioria absoluta.

“Nune’e, bele akontese de’it bainhira Orsamentu 2020 aprovadu no deputadu AMP rasik (1/4 husi deputadu sira ka 17 deputadu), hatama Mosaun Sensura ba meza Parlamentu no maioria absoluta husi deputadu sira vota a-favór ba Mosaun Sensura ne’e. Se la nune’e, sei la akontese Demisaun Governu. Katak, VIII Governu Konstitusionál sei dura to’o ninia mandatu ramata”, jurista ne’e akresenta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here