DILI, 26 novembru 2019 (TATOLI)-Institutu Nasionál Seguransa Sosiál (INSS), iha tempu badak nia laran, sei emite kartaun identidade ba membru Parlamentu Nasional (PN) na’in 65 ne’ebé maka fó ona kontribuisaun ba seguransa sosiál.
Notísia Relevante : Ho NISS Funsionáriu Bele Identifika Valór SS
Prezidente Konsellu Administrasaun INSS, Longuinhos Armando, hateten, kartaun identidade seguransa sosiál ne’e sei distribui ba membru PN durante diskusaun jeneralidade ba proposta OJE 2020 iha semana oin.
“Foin lalais, ami hala’o audiénsia ho membru parlamentu iha komisaun balun, hodi informa, atu atribui uluk kartaun seguransa sosiál ba deputadu tanba ne’e iha ámbitu diskusaun orsamentu jerál estadu, ita sei oferese hotu ba deputadu 65,” informa Prezidente Konsellu Administrasaun INSS, Longuinhos Armando, ohin, ba TATOLI, iha nia servisu fatin, Caicoli, Dili.
Notísia Relevante : INSS Planu Prodús Kartaun Identidade Seguransa Sosiál
INSS mós halo hela verifikasaun dadus ba membru Governu Da-ualu atu hetan kartaun seguransa sosiál molok remata tinan 2019.
Notísia Relevante : INSS Rejista Ona Traballadór Rihun 90
Longuinhos Armando, realsa tan katak, ba futuru, instituisaun estadu ne’e sei emite kartaun ba Funsionáriu Públiku, ajente administrasaun públiku, no traballadór setór privadu sira.
Nia esplika, funsaun husi kartaun identidade ne’e maka atu bele foti osan seguransa sosiál bainhira tinan atinje 60 ba reforma.
Notísia Relevante : Kompañia 1.344 Halo Ona Aplikasaun ba Rejime Kontributivu Seguransa Sosiál
Tuir dadus INSS nian rejista to’o daudaun ne’e, benefisiáriu rihun 90-resin hosi setór privadu no públiku maka fó ona kontribuisaun hodi ko’a sira-nia osan kada fulan ba seguransa sosiál.
Jornalista : Nelson de Sousa
Editór : Francisco Simões
