Ofisér Lixura Munisípiu Dili, Francisco dos Santos. Imajen/Osória Marques

DILI, 26 novembru 2019 (TATOLI)-Governu sentrál liuhosi Ministériu Administrasaun Estatál oferese tan karreta 10 ba Autoridade Munisípiu Dili atu bele apoia servisu tula fo’er iha Dili laran.

Antes ne’e, Autoridade Munisípiu Dili iha de’it karreta 40 hodi responde ba tula lixu iha bairru sira iha Dili laran. Maibé tanba kreximentu populasaun iha Dili laran, loron ba loron aumentu, maka lixu mós aumenta.  Tanba ne’e presiza duni fasilidade sufisiente atu responde situasaun lixu sira iha Dili laran.

Ofisér Lixura, Munisípiu Dili, Francisco dos Santos, rekoñese, kreximentu populasaun iha kapitál Dili ne’ebé aumenta kontribui mós ba aumenta lixu iha Dili laran. Tanba presiza duni iha jestaun di’ak ho ekipamentu sufisiente atu korresponde servisu hamoos lixu iha Dili laran.

Tuir Francisco dos Santos, investor Xinés, Bangladesh, Indonézia, India no rai seluk-seluk, ne’ebé hala’o atividade investimentu iha area negósiu kioske, loja, super merkadu, loke terang bulan, martabak no loke bakso, kontribui maka’as mós ba kreximentu lixu iha Dili.

“Iha fulan neen ka hitu ba kotuk, ita ladún fokus oinsá foti fo’er sira iha Dili laran ho didi’ak no lalais, tanba ne’e, fo’er barak naklekar iha Dili laran. Maibé iha fulan sira ikus ne’e, komesa hamoos beibeik no foti lixu sira ne’e ba soe iha Sentru Lixeira Tibar,” informa Francisco dos Santos, hodi responde Ajénsia TATOLI, ohin, iha nia servisu fatin, Edifísiu Administrasaun Munisípiu  Dili iha Matadoru, Dili.

Nia dehan ho total karreta 50 tula fo’er iha Dili laran fahe tuir zona, haat, hanesan Zona Dom Aleixo, Vera Krús, Metinaro ho Na’in Feto.

Iha mós mekanizmu foti fo’er nian, mak hanesan, iha tuku 07:00 dadeer ho tuku 17:00 loro-kraik, karreta sira komesa foti ona lixu iha Dili laran no ba komunidade tenke soe fo’er iha tuku 17:00 loro-kraik.

Mezmu iha ona regra, tuir Francisco dos Santos nia observasaun katak, populasaun seidauk kumpre ho didi’ak tempu atu soe lixu. Piór liu tan, seidauk iha konsiénsia atu soe lixu iha lixu fatin.

Autoridade Munisípiu Dili mós hasai tiha ona sirkulár ba restaurante, ofisina, loja no super merkadu sira atu ida-idak ba soe rasik fo’er ne’ebé sira prodús ho sira nia transporte rasik.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here