Diretór Jerál Autoridade Aduaneira (AA)/Alfándega, José António Fátima Abílio. Imajen Tatoli/Egas Cristovão.

DILI, 26 novembru 2019 (TATOLI) – Diretór Jerál Autoridade Aduaneira (AA/Alfándega), José Antonio Fátima Abílio, informa parte AA konklui ona prosesu investigasaun administrativa hodi muda ona funsionáriu na’in-haat husi Alfándega Batugadé  mai nasionál hodi hein prosesu investigasaun kriminál husi Ministériu Públiku (MP).

“Parte ami-nia konklui ona prosesu investigasaun administrativa ba funsionáriu na’in haat ne’ebé mak momentu ne’e fó atendimentu direta ba kazál timoroan, no halo mudansa ona mai iha nasionál hodi hein prosesu investigasaun kriminál husi Ministériu Públiku”, Diretór Jerál AA relata ba Ajénsia TATOLI iha edifísiu Alfándega, área Palásiu Governu, ohin.

Diretór Jerál ne’e friza entre na’in-haat ne’e, rua mak iha pozisaun ka asume kargu no rua seluk ne’e funsionáriu baibain Alfándega nian.

“Ami halo ona mudansa mai nasionál no ba na’in-rua nia pozisaun mós ami hasai ona husi kargu hodi hein prosesu kontinuasaun no investigasaun husi Ministériu Públiku”, katak.

Nia dehan hein investigasaun husi MP tanba kazu ne’e ligasaun ho krime. “Ami mós akompaña prosesu investigasaun ba krime husi Ministériu Públiku para ikus mai ita bele konjuga. Se iha rezultadu ikus mak envolve iha prosesu ne’e automatikamente husi Ministériu Públiku kriminaliza no hetan mós sansaun administrativa ka demite”, afirma.

Diretór Jerál ne’e informa, daudaun ne’e funsionáriu na’in-haat sei hala’o hela knaar, maibé laiha ona pozisaun hodi hein investigasaun ba prosesu krime nian.

Relasiona problema ne’e, ekipa konjunta Asuntu Komisaun Anti Korrupsaun ba Prevensaun no Sensibilizasaun, Espesialista Anti-Korrupsaun (EAK), KFP, Provedór Direitu Umanu no Justisa (PDHJ, sigla portugés) Rejionál Bobonaru, observa Postu Servisu Fronteira Motain, Nunura-Tunu Bibi iha Bobonaru, iha sesta-sábadu (05-06/07/2019) liubá nota Alfándega Motain menus rekursu iha tékniku uza mákina raiu-x hodi kontrola sasán sira ne’ebé konsidera kontra-bandu.

Tuir Lei Funsaun Públika, bainhira funsionáriu ida envolve iha kazu krime hanesan fasilita droga mai Timor-Leste sei demite husi knaar.

Iha kuarta (29/05/2019),  JSP ho nia kaben AS lori ai-moruk droga ka pílula hamutuk 4874 tau iha mákina impresora mutin tipu EPSON A4, maibé ekipa Alfándega ida ne’ebé halo pasa revista la deteta no to’o liubá Alfándega Indonézia nian maka hetan no detein timoroan na’in-rua ne’e.

Notísia relevante : Kazu Droga, AA Muda Ona Funsionáriu Balun Iha Batugadé mai Nasionál

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here