Família hosi Maulear no Bilear hasoru malu ho Prezidente Repúblika, Francisco Guterres Lú Olo, hodi hato’o gratidaun ba kondekorasaun ne’ebé Estadu sei fó iha selebrasaun loron Proklamasaun Independénsia. Imajen/Mídia PR

Dili, 26 novembru 2019 (TATOLI) – Iha selebrasaun loron Proklamasaun Independénsia 28 Novembru 1975 ba dala-44, Estadu sei kondekora Eroi António Pereira Carvarino ‘Maulear’ no Eroina Maria do Céu Gonçalves Pereira ‘Bi Lear’.

Tanba ne’e, família eroi na’in-rua ne’e, hala’o sorumutu ho Prezidente Repúblika (PR), Francisco Guterres Lú Olo, hodi hato’o sira nia gratidaun ba Estadu Timor-Leste, ne’ebé rekoñese kontribuisaun sira ninia inan-aman.

“Uluk nanai Ha’u agradese ba Prezidente Repúblika tanba fó oportunidade mai ami, atu bele mai hasoru Nia, no ami agradese mós ba Estadu Timor-Leste ne’ebé fó rekoñesementu no apresiasaun ba ami nia inan-aman tanba sira mós ajuda Timór ninia luta ba ukun rasik-aan”, tenik oan husi Saudozu Maulear, Luli Haryo Wirawan, iha Palásiu Prezidensiál hafoin hasoru malu ho PR Lú Olo, tersa ne’e.

Militár Indonézia, Hardiwan, foti Luli iha tinan-1979 no lori ba Indonézia hodi tau matan hanesan oan rasik, tanba ne’e PR konsidera maski inimigu rasik iha maibé sei iha ema ho sentimentu nu’udar umanu.

Enkuantu, tinan-1984 Cruz Vermelha Internasionál evakua Jorge Carvarino hamutuk ho ninia bin alin, Leila Carvarino no José António Carvarino husi Dili ba Austrália tanba persegisaun.

Nune’e, oan hosi Maulear, Luli no Jorge Carvarino sei reprezenta sira ninia inan-aman hodi simu  kondekorasaun husi Xefe Estadu, nu’udar rekoñesimentu no valorizasaun ba kontribuisaun.

Hafoin tinan-40 husik malu tanba funu no hela iha nasaun seluk ho família ketak-ketak, Jorge Carvarino no Luli  foin ba dahuluk hasoru malu.

“Ohin momentu importante ba nasaun Timor-Leste tanba nasaun hahú halibur ninia oan mane no feto sira liuliu fó rekoñesimentu ba família”, tenik Jorge Carvarino.

Tuir sira, fila mai Timor-Leste hodi partisipa iha kondekorasaun ba inan-aman nia luta, nu’udar momentu markante iha istória tanba bele hatene liután istória Timor-Leste ne’ebé sei sai parte husi vida nu’udar oan husi luta na’in ida no ba povu Timor-Leste hodi bele hatene mós asu’ain sira-nia oan.

Mau-Lear nu’udar estudante timoroan ne’ebé fila husi Portugal hafoin Revolução dos Cravos no partisipa ativa iha FRETILIN. Hafoin Proklamasaun Independésia nomeadu nu’udar Ministru Justisa, no tinan 1976 sai Komisáriu Polítiku ba Setór Centro Norte no  asume kargu nu’udar Primeiru-Ministru  no Vise-Prezidente FRETILIN to’o militár Indonézia kaptura no oho iha 1979.

Bi-Lear nu’udar fundadora ida ba ASDT no FRETILIN. Hafoin “Kontra Golpe”, nu’udar membru Komité Sentrál, Bi-Lear hanesan mós dirijente Organização Popular da Mulher Timor, ne’ebé nomeadu sai Vise-Sekretária Departamentu Edukasaun hodi tau matan ba edukasaun iha Timor laran tomak.

Hafoin invazaun, sai Adjunta Polítika iha Setór Sentru Norte to’o militár Indonézia kaptura no oho iha 1979.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here