Deputadu Bankada PD, Mariano Assanami Sabino. Imajen Tatoli/Egas Cristóvão

DILI, 25 novembru 2019 (TATOLI)–Dalan diálogu mak instrumentu kulturál hodi hakotu inserteza polítika iha rai laran.

“Ne’e pasu pozitivu. Ita hein katak diálogu ne’e la’o duni, la’ós ko’alia de’it. Ita-nia kultura sempre liuhosi diálogu. Tan ne’e, polítiku sira labele haluha katak instrumentu diálogu ne’e instrumentu kulturál iha ita-nia sosiedade”, Deputadu Bankada Partidu Demokrátiku (PD), Mariano Sabino Assanami informa ba jornalista sira iha resintu Parlamentu Nasionál, tersa ne’e.

Assanami agradese ho pedidu Prezidente Repúblika, Francisco Guterres ‘Lú Olo no Primeiru-Ministru (PM), Taur Matan Ruak, ne’ebé hasai mensajen ba diálogu.

Lee mós: Deputadu PLP-KHUNTO Apoia Diálogu, CNRT Espera Komunikasaun La’o Susesu

Assanami fiar Xefe Governu ho Xefe Estadu hasoru malu, sira na’in-rua mak tenke inisia diálogu, tanba kaer órgaun soberanu iha rai ida-ne’e.

Tuir nia katak diálogu ne’e mak hamosu debate, diskusaun kle’an hodi fó solusaun ba problema iha rai-laran.

“Diálogu ne’e nesesáriu tanba ita bele ko’alia ba malu hodi haree asuntu importante nasaun nian”, nia tenik.

Assanami apresia ho inisiativa ne’e no espera komunikasaun ho parte sira seluk bele la’o ho susesu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here