Administradór Munisípiu Aileu, João Tilman do Rêgo. Imajen: Rafy Belo

AILEU, 25 novembru 2019, (TATOLI)-Administradór Munisípiu Aileu, João Tilman do Rêgo, husu joven Munisípiu Aileu atu prepara aan hodi kompete iha vaga FALINTIL-Forsa Defeza Timor-Leste (F-FDTL).

“Ha’u hakarak dehan vaga ne’e primeiru hanesan oportunidade ba joven sira atu bele prepara sira-nia fíziku, mentál, lideransa, karik tama duni iha militár. Segundu, hanesan nasaun, estadu tenke iha forsa ida para bele asegura tantu interna no externa, ne’ebé depende ba joven hothotu iha munisípiu espesiál Aileu hakarak atu kompete ne’e liberdade, oportunidade mós mai daudauk maibé prepara aan didi’ak para bele partisipa iha kompetisaun ida ne’e,” hateten Administradór Aileu ne’e ba TATOLI iha nia kna’ar fatin, Aileu, ohin.

Notísia relevante:Segunda, Komandu F-FDTL Loke Vaga ba Membru Foun 600

Lider másimu Aileu ne’e hatutan, kompetisaun ida ne’e sei fó oportunidade ba ema hothotu hodi partisipa signifika hothotu iha direitu atu partisipa hanesan sidaudaun.

“Hothotu bele partisipa maibé prepara aan didi’ak tanba kompetisaun ida ne’e bazeia ba ema nia mentalidade, kapasidade no fízika tuir rekizitu sira ne’ebé aplika ona iha formuláriu nia laran no partisipasaun sira ne’e mai hosi joven nível territóriu Timór”.

João Tilman do Rêgo espera katak joven Aileu bele partisipa iha vaga ne’e no kontribuisaun joven sira nian bele presta ba estadu, nasaun no ba povu iha futuru.

Notísia relevante:Joven Aileu Hein Formuláriu F-FDTL Dezde Tuku Neen Dader To’o Lokra’ik Seidauk Fahe

Jornalista: Antónia Gusmão

Editór     : Rafy Belo

HAKEREK NO HATÁN

Please enter your comment!
Please enter your name here