Vise-Ministru Administrasaun Estatál, José Abílio Caetano. Imajen Tatoli/António Gonçalves

DILI, 25 novembru 2019 (TATOLI) – Vise-Ministru Administrasaun Estatál, José Abílio Caetano, ne’ebé hanesan mós Prezidente Komisaun Organizadora, hala’o sorumutuk ho Prezidente Repúblika (PR), Francisco Guterres Lú Olo hodi ko’alia kona-ba aktividade komemorasaun aniversáriu ba dala-48 loron Proklamasaun Independénsia 28 Novembru.

“Ohin ha’u mai ho ekipa ki’ik ida hosi protokolu komisaun organizadora nian, ami mai hamutuk hasoru Nai Prezidente hodi breafing ba atividade no lala’ok seremónia komemorasaun 28 Novembru. Tinan ne’e, Veteranu na’in-74 maka sei simu kondekorasaun”, dehan Ministru Caetano hafoin enkontru ho PR Lú Olo iha Palásiu Prezidensiál, segunda ne’e.

Seremónia loron istóriku ne’e, sei hahú tuku 09:00 dader no Xefe Estadu maka sei sai inspetór, enkuantu ninia sekuénsia maka hanesan baibain maibé sei hamutuk ho kondekorasaun ba Veteranu.

“Ohin informa ba Prezidente Repúblika, katak aktividade ba komemorasaun 28 Novembru  2019, karik tinan ida-ne’e simples liu tinan kotuk liubá maibé nafatin valoriza loron istóriku 28 Novembru 1975”, nia akresenta.

Governante ne’e haktuir, selebrasaun loron Proklamasaun Independénsia, hahú ho atividade ki’ik hanesan feira durante loron tolu nia laran iha resintu Sekretaria Estadu Juventude no Desportu (SEJD).

Iha loron 27 novembru, sei hala’o mós misa agradesementu iha Igreja Katedral Dili iha tuku 09:00 dader, ne’ebé prezide husi Amu José António.

Nia informa, komemorasaun loron istóriku tinan ne’e laiha prezensa hosi bainaka rai liur maibé konvida de’it maka Embaxadór sira ne’ebé akreditadu iha Timor-Leste, ajénsia internasionál sira, Membru Governu, Membru Parlamentu Nasionál, Diretór Jerál no Nasionál Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL) no mós família veteranu ne’ebé akompaña kondekorasaun.

Prezidente Komisaun Organizadora ne’e salienta, tinan ne’e seremónia hala’o de’it iha Palásiu Governu Dili, tanba  loron Proklamasaun Independénsia 28 Novembru 1975 hala’o iha fatin ne’e.

Hafoin seremónia ne’e, sei iha Cocktail ki’ik ida hodi agradese ba bainaka sira no iha lorokraik sei iha seremónia hatun Bandeira Nasionál, Prezidente Parlamentu Nasionál, Arão Noé de Jesus da Costa Amaral maka sei sai inspetór seremónia.

Iha biban ne’e, PR Lú Olo, sente kontenti ho novidade ne’ebé hato’o husi Prezidente Komisaun Organizadora ho ninia ekipa.

“Presidente Repúblika kontenti ho ami nia relatóriu katak tinan ida ita komemora ho simples maibé ita nafatin valoriza tanba loron ne’e loron ne’ebé deside ita nia destinu nasaun nian ne’ebé to’o ohin loron ita nasaun indepedente,”nia haktuir.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here