Foto: Google.com

DILI, 25 novembru 2019 (TATOLI)-Instituisaun akadémika privada, Universidade Oriental Timor Lorosa´e (UNITAL) tuir planu, iha tinan ne´e, sei gradua estudante finalista na´in 500. Maske nune´e, seidauk iha data fiksa ba selebra graduasaun ne´e.

Reitor Unital, Florindo Pereira. Imajen Egas Cristovão

“Ita seidauk termina bainhira mak atu fó graduasaun ba estudante finalista sira tanba prosesu tomak sei hein Ministériu Ensinu Superiór Siénsia no Kultura publika tiha lista graduante sira nian iha Jornal Repúblika mak universidade foin deside loron graduasaun,” informa Reitór Florindo Pereira, ba Ajénsia TATOLI iha Kampus UNITAL, Becora, ohin.

Reitór fó sai katak prosesu tarde iha fallansu lista graduante sira nian ne’ebé mak universidade haruka ba MESSK (Ministériu Ensinu Superiór Siénsia no Kultura). Problema tanba dokumentu estudante sira nian barak mak la hanesan. Tan ne’e ministériu haruka fila fali hodi hadi´a. Universidade tenke la´o tuir saida mak governu hakarak.

Karik la iha problema ho graduadu sira, tuir Reitór Florindo Pereira katak iha novembru nia laran ne´e realiza ona serimónia graduasaun ne´e.”Ha’u-nia hakarak graduasaun ne’e bele realiza iha novembru maibe imposibel tanba oras ne’e sei iha hela prosesu verifikasaun dokumentus entaun ita tenke hein. Fallansu sira hanesan ne’e sempre akontese maibé universidade buka hadi´a beibeik atu minimiza.

Entaun iha biban ida ne’e, reitór UNITAL ne´e reforsa tan katak instituisaun buka atu hein depois governu publika tiha lista graduadu sira mak foin aselera graduasaun maibe graduasaun tiha mak foin publika naran iha Jornál Repúblika,” reforsa tan akadémiku UNITAL ne´e.

“Ho nune’e mak UNITAL seidauk bele hatur data ida loloos maibé klaru katak graduasaun ne’e tenke realiza duni iha tinan ida ne’e,” esplika Reitór Florindo Pereira.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here