Labarik fa'an manu tolun da’an iha Dili laran hodi asisite juventude sira hatais roupa tradisionál halo marxa. Imajen/António Gonçalves

DILI, 25 novembru 2019 (TATOLI)- Timor-Leste liuhosi Komisaun Nasionál Direitu Labarik  (KNDL) hamutuk ho Ministériu Solidariedade, Sosiál no Inkluzaun (MSSI), ohin, selebra loron mundiál ba labarik.

Komisária Nasionál Komisaun Direitu Labarik, Dinorah Granadeiro. Imajen/TATOLI

Iha nasoins unidade selebra loron mundiál direitu ba labarik ne’e ba dala-30 no ba Timor-Leste komemorasaun ne’e ba dala-16. Ho nune’e, Komisária Nasionál Komisaun Direitu Labarik, Dinorah Granadeiro, informa, loron mundiál hanesan momentu globál ba labarik sira no atu afirma fali mundu nia asaun  hodi halo advokasia, Konsensializasaun no asuntu hotu ne’ebé liga ho labarik nia direitu.

“Ita hatene katak Estadu TL investe makaas iha direitu labarik nian. Liuhosi Ministériu relevante, ezemplu eskola  gratuita maibé investimentu seidauk la’o ho di’ak,” Komisária Dinorah Granadeiro.

Nia rekoñese katak  investimentu ba direitu labarik iha Timor-Leste seidauk la’o ho másima tanba ne’e mak labarik barak iha Timor sei  mal nutrisaun aas no barak  la eskola no barak mós mak komesa tama iha traballu infantíl.

Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto reprezenta MSSI hateten, selebrasaun tinan 30 konvensaun direitu labarik hodi halo marxa atu fó atensaun ba públiku katak ohin no ba oin labele sosa labarik sira-nia sasán.

“Atividade ida ne’e hodi marka ita hotu nia kompromisu atu hapara violénsia hasoru labarik hahú hosi uma laran no hosi ema ida-idak nian nune’e iha sosiedade, eskola, iha fatin hotu-hotu iha nasaun ida ne’e,” dehan DJ MSSI ba TATOLI iha SEJD, Lecidere, Dili.

Situasaun labarik barak komesa fa’an sasan iha dalan ninin no iha merkadu nasionál ho merkadu tradisionál sira, DJ MSSI konsidera kestaun hirak ne’e impede labarik sira-nia futuru ba Edukasaun. Nune’e husu ba Governu, sosiedade sivíl no populasaun atu hapara sosa sasán husi labarik no fó nafatin hanoin ba família sira atu tau importánsia ba labarik sira nia direitu eskola.

Reprezenta Labarik iha TL ba loron mundiál labarik tinan ne’e, Micela Freitas husu ba Estadu atu kria kondisaun ida dignu hodi labarik sira moris hakmatek, livre hosi violénsia oioin, inklui livre hosi esplorasaun seksuál. Tanba ne’e Estadu tenke aplika jero toleránsia ba kualkér violénsia no abuzu ba labarik.

“Ami labarik hakarak goza ami-nia direitu ba edukasaun no partisipasaun prosesu aprendizajen ba eskola. Tanba ne’e husu atu harii saneamentu ne’ebé kompletu iha eskola sira”.

Nia afirma tan, labarik hakarak asesu informasaun di’ak no adekuadu hodi aumenta sira-nia koñesimentu no dezenvolve sira-nia matenek. Tanba ne’e, husu atu kria biblioteka nasionál ba labarik sira no mós regula publikasaun informasaun iha mídia.

“Ami hakarak goza ami-nia direitu labarik hanesan direitu labarik hanesan sobrevivénsia, direitu dezenvolvimentu, direitu partisipasaun no protesaun. Nune’e kódigu labarik ne’ebé prepara ona hosi MSSI tenke ajenda ona hodi diskute no entrega ba Konsellu Ministru, no mós husu ho urjente atu aprova lalais lei konvensaun direitu labarik ne’ebé kaduka tiha iha tinan kotuk.

Nia dehan, labarik hakarak moris di’ak ho saudavel, nune’e husu atu haforsa polítika sira iha protesaun iha TL, liuhosi aumenta rekursu no hadi’a mekanizmu servisu sira”.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here