Alin defisiénsia sira tuir hela Aula, iha sentru rekursu ba labarik Defisiénsia Irmas,Alma Pantai Kelapa Dili. Imajen/Nelson de Sousa

DILI, 25 novembru 2019 (TATOLI)-Sentru Rekursu ba Labarik Defisiénsia Irmán Alma iha Praia dos Qoqeiros, Dili, daudaun ne’e, fó hela asisténsia terapia no formasaun formal ba labarik defisiénsia Timor-oan hamutuk na’in 35.

Superiór komunidade Alma iha Timor-Leste, Me. Getnedis Bidi. Imajen/Nelson de Sousa

Labarik sira ne’e hosi tinan 5 to’o tinan 19 kompostu hosi mane na’in 21 no feto  na’in 14 mai hosi Munisípiu no Kapitál Dili.

Superiora Komunidade Madre Alma iha Timor-Leste, Me. Getnedis Bidi, informa, labarik defisiénsia hirak ne’e ho kategoria oioin hanesan defisiénsia tilun, matan la moos, fíziku no kondisaun mentalidade.

 “Hosi númeru labarik 35 ne’e,  na’in 17 mak iha Asrama (Dormitóriu) no    na’in 18 mak hela iha li’ur loron-loron sira nia- inan -aman lori hela mai iha sentru. Ami nia asisténsia ba sira mak  liuhosi  terapia no tuir aula kada loron,” informa Me.Getnedis Bidi ba Ajénsia TATOLI, ohin, iha ninia servisu fatin Praia dos Qoqeiros, Dili.

Durante iha aula, labarik sira aprende kona-ba lee, pintura,  hakerek letra sira, jinástika, desportu no seluk tan.

Iha 2019, Fundasaun Madre Alma ne’e konsege haruka labarik na’in rua ba  tama iha eskola pre-eskolár hodi kontinua sira-nia estuda hafoin kondisaun fíziku iha ona progresu pozitivu durante hala’o terapia.

Nia relata, durante ne’e hetan apoiu finanseiru hosi Governu liuhosi Ministériu Solidariedade Sosiál no Inkluzaun (MSSI) ba fundu transferénsia públika.

 “Ami nia sentru ne’e nia operasionál jere rasik hosi ami,” tenik Madre  Superiora  komunidade Alma,  Getnedis Bidi.

Sentru ne’e eziste hahú kedas iha 2004 to’o agora ho ninia misaun aplika evanjellu ba sira ne’ebé ki’ik liu, sira ne’ebé ki’ak liu no mukit, no sira ne’ebé la hetan tulun hosi ema seluk hodi moris hamutuk ho sira atu tulun sira para bele partisipa ho di’ak atu  iha responsabilidade  ba sira nia-moris, nesesidade no sira-nia problema.

Sentru Alma ninia vizaun maka moris konsagra-aan ba Kristu tuir Santa Maria nia moris, nu’udar virjen no Inan.  Nune’e mós konsagra-aan atu buka, eduka nafatin, no serve ho domin ba sira ne’ebé maka defisiénsia tanba Inan-aman laiha  liu-liu sira ne’ebé terus no susar hodi  rezolve sira-nia moris tuir espíritu São Vicente  Paulo nian.

Jornalista : Nelson de Sousa

Editór       :  Francisco Simões

HAKEREK NO HATÁN

Please enter your comment!
Please enter your name here