Diretora Pro-Ema, Simone Assis, akompaña hosi reprezentante Grupu Arte Zeitu no Things and Stories, halo audiénsia ho Prezidente Repúblika (PR), Francisco Guterres Lú Olo. Imajen/Mídia PR

DILI, 25 novembru 2019 (TATOLI) – Relasiona ho Loron internasionál kontra violénsia ho tipu hotu no diskriminasaun kontra feto, Diretora Pro-Ema, Simone Assis, akompaña hosi reprezentante Grupu Arte Zeitu no Things and Stories, halo audiénsia ho Prezidente Repúblika (PR), Francisco Guterres Lú Olo.

Iha biban ne’e, Diretora Pro-Ema hateten durante ne’e sira sempre tulun feto sira ne’ebé hasoru difikuldade, liuhosi kapasitasaun iha área eduksaun, sosiál, no ekonómika.

“Ami iha kursu ba feto sira ne’ebé la ramata sira ninia eskola sekundária, ba sira ne’ebé hasoru violénsia doméstika no hasoru abusu sexual. Ami ajuda sira liuhosi kursu administrasaun, salaun beleza, gastronomia no seluk tan”, nia tenik hafoin hasoru malu ho PR Lú Olo, iha Palásiu Prezidensiál, segunda ne’e.

Nia haktuir, tuir peskiza ne’ebé halo iha tinan 2016, Timor-Leste hatudu katak porsentu 55 feto maka la remata sira nia estudu sekundária.

“Ida-ne’e hatudu katak feto sira kaben sedu, entaun sira tama ba siklu violénsia no sira la hetan oportunidade serbisu”, Diretora akresenta.

Tuir nia, durante Pro-Ema halo peskiza, dadus husi Polísia no organizasaun ne’ebe maka serbisu iha área violénsia doméstika no violénsia hasoru feto no labarik rejista númeru akontesimentu aas.

Tanba ne’e, nu’udar organizasaun ne’ebé fó mahon ba feto, Pro-Ema sempre buka atu fó dalan ba feto sira liuhosi kapasitasaun profisionál atu hametin sira nia kapasidade, nune’e bele partisipa ativu iha sosiedade.

“Ami espera katak aban bain rua ami bele ko’alia iha komemora loron internasionál katak Timor-Leste laiha violénsia hasoru feto no labarik,” nia subliña.

Iha sorumutu ida-ne’e, Pro-Ema mós aprezenta sira ninia produtu hanesan chocolate.

“Ami mai hato’o ami-nia produtu ne’ebe alin feto no estudante sira halo maka produtu orgániku no produtu lokál hanesan kakau no ami nia produtu chokolate hanaran Mehi”, nia tenik.

Biban ida-ne’e, PR Lú Olo promote sei haforsa tan kampaña Pro-Ema, ne’ebé oras ne’e la’o no hakarak hapara violénsia hasoru feto no labarik.

Simone Assis, espresa ninia sentimentu no hato’o sira-nia prekupasaun ba Prezidente Repúblika.

“Ami kontenti tanba ami bele hasoru Prezidente no bele hato’o ami nia preokupasaun kona-ba violénsia hasoru feto no labarik iha Timor -Leste, ne’ebé nível aas tebes no realidade duni. Prezidente ho laran luak simu ami-nia prekupasaun”, nia dehan.

Nune’e, Xefe Estadu husu ema hotu atu habkribi violénsia no abuzu sexual hasoru feto sira, liuliu sira ne’ebé ho idade joven.

Simone Assis mós agradese ba PR Lú Olo ninia laran luak hodi simu sira no husu Xefe Estadu ninia kontribuisaun hodi sensibiliza ema hotu, liuliu mane sira atu respeita feto, hakribi violénsi no abuzu sexual ba feto sira.

“Feto la’os objetu ba buat hotu. Feto la’os mane-nia atan. Feto hanesan mós mane, diferensa maka iha sexu. Hanoin feto sira-nia kontribuisaun durante luta ba ukun-aan ne’ebé revela feto nia korajen no papél hanesan mós mane sira. Tanba ne’e, iha tempu ukun-aan feto no mane kompleta malu hodi hamutuk dezenvolve sosiedade no nasaun”, dehan PR Lú Olo.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here