Nutrisaun. Ilustrasaun

DILI, 25 novembru 2019 (TATOLI)-Asesór Primeiru-Ministru Asuntu Nutrisaun no Seguransa Ai-han, Filipe da Costa informa katak tinan-tinan Governu aprova orsamentu ho objetivu mak atu hadi´a moris di´ak povu nian no nutrisaun ne’ebé mak di’ak liu.

Maibé, buat hotu la’o di’ak depende ita-nia estratejia ne’ebé mak iha no ita-nia planu asaun ne’ebé mak di’ak.

“Tanba tinan haat no lima tuir mai ne’e saida mak importante para hodi hadi´a lalais, nutrisaun ita progresu iha ona, ita konsege halo fasilidade hotu hotu di’ak maibé ita presiza aselera liután tanba ne’e mak ita presiza halo planu ne’ebé di’ak,” dehan Asesór Filipe da Costa ba jornalista sira, segunda (25/ 11/2019).

“Ha’u espera katak ita halo planu ne’e hotu ita sei halo advokasia di’ak ba Governu sira no ha’u mós rekomenda katak tuir mai envolvimentu setór hothotu ita labele haluha setór privadu no sosiedade sívil tanba sira-nia servisu besik liu povu,” nia konsidera.

Entaun iha planu setór hotu-hotu, tuir Primeiru-Ministru Asuntu Nutrisaun no Seguransa Ai-han, Filipe da Costa  katak sosiedade sívil sira-nia papel ita tenki defini no oinsá governu ajente sira-nia servisu hodi halakon má nutrisaun hodi envolvementu iha setór hothotu para servisu di’ak no lailais.

Tanba ita-nia setór privadu mak distribui hahán iha área rurál no mós ita-nia setór sosiál mak halo kampaña di’ak hodi hanorin ita-nia populasaun sira hodi implementa no adopta ideia sira ne’ebé mai husi politika ne’e rasik tanba ne’e mak sira-nia envolvimentu mós importante hanesan mós lider relijiozu, lider nasionál sira mós presiza atu nune’e sira-nia papel mós define hodi ita fó-hanoin ba sira para halo sira-nia atividade atu loron ida má nutrisaun ne’e ita bele halakon.

“Governu halo planu estratéjiku ida ne’ebé ita sei hadee ba estratejia dezenvolvimentu iha tinan-2030, ita hakarak redús má nutrisaun hodi povu moris di’ak.Governu mós lansa polítika barak hanesan estratejia  planu halakon hamlaha ita mós iha politika nasionál seguransa ai-han nutrisaun nian,” nia dehan..

Asesór Xefe Governu ne´e mós esplika, bazeia ba estratejia sira ne’e mak Governu investe entaun estratejia sira ne’e ko’alia hotu kona-ba estratejia nasionál nutrisaun ninia hanesan atu rekomenda asaun sira ne’ebé importante atu ita bele investe hodi dezenvolve estratejia ne’ebé di’ak no rekomenda asaun sira ne’ebéiha prioridade atu nune’e governu bele investe ho di’ak tanba polítika sira presiza prezerva hodi haree ba priorodade atu nune’e ita bele atinji lalais nutrisaun ho di’ak tanba iha ona tempu hodi ita-nia tékniku sira haree.

Ita iha tekniku la’ós iha liña Ministeriál de’it maibé ita mós iha parseiru dezenvolvimentu sira hanesan Uniaun Europeu nomós Unicef ita iha pritus sira ne’ebé mai husi internasionál tanba UN mak atu ajuda fasilita no konsulta ho matenek hirak ne’e ita elabora no seriu ba estratejia ne’ebé di’ak rekomenda asoes ne’ebé di’ak fiar katak ita sei rezolve .

Filipe da costa dehan kuandu ita iha má nutrisaun mak sei akontese, entaun ita-nia oan nian kakutak ladun dezenvolve entaun ne’e presiza prodús tan ema ne’ebé ho kualidade menus. Se ita ema kualidade menus ita ema iha nasaun ne’e mós kualidade menus tanba ne’e mak ita presiza investe iha má nutrisaun

Má nutrisaun la’os de’it iha setór saúde nian de’it, se setór saúde ko’alia kona-ba oinsá atu fó susu-been ba labarik oinsá halo imunizasaun, oinsá fó vitamina, maibé setór seluk presiza tau bee estrada tenke di’ak, ema presiza fase liman mak han nomós edukasaun entaun setór hotu hotu nia partisipasaun nia no envolvimentu ne’e importante hotu.

“Kada Ministériu tenke halo ninia estratejia liga mós ba nutrisaun. Ha´u-nia hanoin ita iha de’it planu estratejia multi-setoriál hodi halakon ka redús má nutrisaun iha Timór,” konklui Asesór Primeiru-Ministru Asuntu Nutrisaun no Seguransa Ai-han, Filipe da Costa.

Jornalista : Felicifade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here