Parlamentu Nasionál hasa’e bandeira meia aste ba Deputadu Gilman Exposto dos Santos ninia mate, iha segunda (25/11). Imajen/Evaristo Soares Martins

DILI, 25 novembru 2019 (TATOLI)–Parlamentu Nasionál (PN) iha segunda ne’e, deside hasa’e bandeira meia aste ba Xefe Bankada UDT/FM, Gilman Exposto dos Santos, ne’ebé hakotu iis ohin dadér, iha Ospitál Nasionál Guido Valadares (HNGV-sigla portugés).

“Parlamentu hasa’e bandeira meia aste ba Deputadu Gilman ninia mate atu presta omenajen ikus ba señor deputadu tanba nia hanesan deputadu efetivu”, tenik Vise-Prezidente PN, Maria Angelina Lopes Sarmento ba Agência Tatoli, iha resintu Parlamentu Nasionál.

Notísia Relevante: Deputadu Gilman Exposto Hakotu Iis Iha HNGV

Tuir Angelina, desizaun ne’e foti bazeia ba reuniaun líder bankada ohin dadér.

Deputadu Partidu Demokrátiku (PD), Mariano Assanami Sabino, konsidera PN dada bandeira meia aste hodi rekoñese kontribuisaun ne’ebé Deputadu Gilman fó durante ninia mandatu.

“Família boot Partidu Demokrátiku hato’o sentidu kondolénsia ne’ebé kle’an  tanba ita hotu triste no lakon. Nia la’ós de’it Prezidente UDT, maibé ita sei presiza partidu istóriku ne’e kontinua nafatin ninia ezisténsia iha prosesu dezenvolvimentu”, dehan Assanami.

Nune’e mós, Deputada Bankada FRETILIN, Josefa Pereira, espresa ninia sentimentu triste bainhira simu informasaun kona-ba Deputadu Gilman nia mate.

“Lakon kolega ida di’ak tebes. Ami bele diferente ideolojia polítika, maibé ita hotu nia dalan maka ne’e duni. Hanesan kolega ida-ne’ebé tolerante tebes ba situasaun balun tanba ami dalabarak radikál. Deputadu Gilman sei produtivu maibé planu Nai Maromak nian”, dehan Deputada Bankada Opozisaun ne’e.

Enkuantu, Deputadu Bankada CNRT, Adérito Hugo da Costa, hato’o sentidu kondolénsia ba família matebian.

“Hakfodak ho informasaun ne’e. To’o oras ne’e, nia (Gilman) partisipa ativu iha serbisu Komisaun A nian no fó ninia kontribuisaun maka’as iha audiénsia orsamentu 2020”, Deputadu Adérito tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here