Situasaun jerál merkadu Aileu vila. Imajen: Rafy Belo

AILEU, 25 novembru 2019- (TATOLI)-Negosiantu merkadu Aileu vila preokupadu ho rendimentu lorloron nian tanba volume kompradór menus kompara ho tinan sira uluk.

“Rendimentu agora mínimu los tanba durante ne’e kompradór sira ladun hola ami nian modo no rendimentu ba ami bele hetan 20 dólar minimál liu 10 dólar,” haktuir Negosiante Ismael Bareto ba Ajénsia TATOLI, iha Merkadu Aileu vila, ohin.

Nia dehan, uluk ne’e sira-nia modo folin no rendimentu ne’ebé maka maka sira hetan ne’e, loron ida bele hetan 50 dólar. “Uluk  loron ida ami bele hetan dólar 50 maibé agora arraska los,” kompara Negosiante Ismael Bareto.

Vendedór ne´e informa katak tinan uluk uluk bainhira iha programa merenda eskolár modo folin maibe agora  programa ida ne’e mós ladun la’o tanba ne’e maka rendimentu di´ak maibe depois ida ne’e, agora redimentu araska.

Hatán kona volume kompradór iha merkadu Aileu, tuir negosiante ne’e katak ladun iha maibé sorte di´ak foin hetan iha kuarta-feira no sábadu tanba bazar. Nia mós informa, rendimentu sira maske ladun maibé uza fali hodi sustenta uma laran no selu oan sira-nia eskola no kontribui mós ba “uma-adat”.

Nia parte mós relata problema ne’ebé maka daudaun ne’e negosiante sira iha merkadu Aileu Vila enfrenta hanesan iha merkadu laiha, obriga negosiante sira tenke lalin iha mota maka foin uza ba sira-nia nian nesesidade nune’e mós  kondisaun haris-fatin ne’ebé ladun diak.

“Ami iha ne’e bee laiha no haris-fatin mós kondisaun ladi´ak. Boot sira (lider) husi munisípiu mai haree ona maibé laiha solusaun ba  kestaun sira ne’e,” dehan Ismael.

Iha fatin hanesan, Negosiante Antónia Guterres haktuir rendimentu ne’ebé sira hetan tinan ne’e sira bele konsidera katak ki´ik tebes tanba iha loron ida bele bele hetan  de´it dólar 5, dalaruma la hetan liu loron ida.

Nia kompara, tinan kotuk sira iha rendimentu di´ak tanba bele hetan dolár 20 kada loron maibé iha tinan ne’e la iha liu. Enkuantu, rendimentu ne’ebé maka nia hetan uza hodi sustenta família liuliu selu oan na´in haat, ne´ebé agora balun pré-sekundária no sekundária ona.

Jornalista: Natalino Costa

Editór      : Rafy Belo

HAKEREK NO HATÁN

Please enter your comment!
Please enter your name here