Diretora Jerál Prestasaun Saúde, Odete Viegas da Silva. Imajen/Felicidade Ximenes

DILI, 25 novembru 2019 (TATOLI)-Ministériu Saúde (MS) realiza semináriu hodi halo revizaun nasionál estratejia nutrisaun tinan 2014-2019 no dezenvolvimentu nasionál setór saúde nutrisaun planu estratejia ba tinan-2020 to´o 2024

“Ita hotu hatene katak dezenvolvimentu rekursu hahú kedas husi inan isin-rua no labarik sira foin moris, oinsá ita bele fó nutrisaun ne’ebé di’ak ida ne’e mak ita sei haree mós iha ita-nia estratejia ida ne’e,” dehan Diretora Jerál Prestasaun Saúde, Odete Viegas da Silva iha nia diskursu, iha ámbitu semináriu Planu Dezenvolvimentu Estratéjiku Saúde ba Programa Nasionál Nutrisaun 2020 -2024, iha Hotel Timor, ohin.

Nutrisaun, tuir Diretora Odete Viegas da Silva la´ós MS nia papel mesak maibé ministériu relevante no Governu nia kompromisu liu mós ho parseiru dezenvolvimentu sira oinsá bele kontribui atu bele hadi’a taxa mortalidade no morbilidade ba inan. oan no labarik sira no foinsa’e ida ne’e mak sai hanesan alvu ba diskusaun loron rua nian, ohin no aban.

“Nutrisaun imortante ida iha nasaun ida liuliu Timor-Leste liuhusi Ministériu Saúde dezenvolve mós nia estratejia rasik ba iha Programa Nutirsaun ba iha tinan 2014 to´o 2019 tinan ida ne’e to´o ba rohan,”

“Estratejia ne’ebé mak hahú ba daruak nian husi symposium ida ne’e bolu liña ministeriál hotu no parseiru sira no mós sosiedade sivil, Gabinete Primeiru Ministru ne’ebé mak durante ne’e liuhusi Konsellu Nasionál ai-han ne’ebé mak nia comitment iha Governu kada liña Ministeriál atu bele tau iha prioridade ba programa nutrisaun nian,” nia reforsa.

Diretora Odete Viegas da Silva  haklaken, atu hatutan fali informasaun ne’ebé mak liuhusi estratejia tinan lima liu ba ne’e, atu haree mós ba oin estratejia ne’ebé mak apropriadu no di’ak liu hodi implementa fali iha tinan-2020 no tinan-2024 tanba ne’e mak sira halo diskusaun ba loron ohin no aban.

“Normalmente ita ko’alia ba nutrisaun, ita haree kedas ba etapa ba mil dias ba inan isin-rua, ba labarik tinan-lima mai kraik no mós inan sira fó susu bebé; ita ko’alia ba nutrisaun investimentu ida ne’ebé mak boot liu liuliu iha Ministériu Saúde ba iha Diresaun Nasionál Saúde Públika Departamentu Nutrisaun Saúde Materna Infantil sai hanesan prioridade inportante liu,” nia esplika.

Diretora ne´e reforsa, kuandu ita ko’alia kona-ba nutrisaun, ita investe kedas husi inan isin-rua, inan tuur ahi to´o labarik iha fulan zero, to´o tinan-rua ne’e signifika ita investe labarik foin moris no inan isin rua, ita mós bele ona redús gastu sira ba governu iha tinan oin mai.

Entaun ekonomikamente ita mós poupa orsamentu ba Governu no mós ita redús kustu ba moras kuandu labarik ne’ebé moris mai ho moras krónika sira ne’e signifika ba futuru labarik ne’e hetan moras ba iha moras tensaun, moras kurasaun, moras diabetes. Ida ne’e mak Ministériu Saúde nia planu hodi haree ba iha nutrisaun ne’e.

La´ós bazeia ba estratejia tinan-tinan ba planu asaun anuál maibé Departamentu Nutrisaun Saúde Maternidade Infantil no promosaun no mós departamentu moras hada’et no la hada’et ne’e sai hanesan komponente importante ida oinsá atu bele kontribui ba iha programa ida ne’e.

“Ita haree ba inan ne’ebé isin-rua durante to´o partu no bebé ne’e too atinji tinan rua ami sempre hateten inan isin-rua saida mak tenke halo, nia tenke ba konsulta regulár iha maternidade durante to´o inan isin rua nee partus ne’e signifika tenke kontrola hahú husi bebé ne’ebé moris husi fulan ida to´o fulan sia no vasinasaun sira ne’e tenke kompletu ida ne’e kontribui ba iha estadu nutrisionál ne’e di’ak ba inan no bebé,” nia esplika.

Entretantu, partisipa iha workshop kona-ba Planu Dezenvolvimentu Estratejiku Saúde ba Programa Nasionál nutrisaun 2020-2024  mak reprezentante liña ministeriál, Uniaun Europeia (UE), reprezentante UNICEF (Fundu Organizasaun Nasaun Unida ba Labarik, sigla inglés), reprezentante OMS (Organizasaun Mundiál Saúde), asesór primeiru-ministru asuntu nutrisaun no seguransa ai-han inklui profisionál saúde sira.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here