Diretór ESJ 5 de Maiu, Manuel Verdial. Foto Facebook

DILI, 25 novembru 2019 (TATOLI) – Ensinu Sekundáriu Jerál (ESG) 5 de Maio Becora, planea atu kontrata profesór informatika, iha tinan letivu 2020.

“Ami-nia planu ida ne’e bazeia ba nesesidade eskola nian liuliu iha área informatika tanba ita iha ona komputadór 30 resin, presiza iha profesor ida atu responsabiliza materia ida ne’e,” informa Diretór ESG 5 de Maio, Manuel Verdial ba Ajénsia TATOLI, iha nia knaar fatin, Becora, ohin.

Ezekutivu Manuel Verdial hateten, parte eskola iha ona profesór ida mak atende hela materia informatika ne’e maibe hanesan voluntáriu de’it ninia saláriu eskola selu la tuir padraun (standar). Iha 2020, ESG 5 de Maio loke prosesu kontratu ba profesór ne’e atu bele desidi ninia saláriu hodi kontinua aselera programa refere.

“Antes ne’e eskola selu profesór ne’e liuhusi kontribuisaun dólar ida kada fulan husi inan-aman sira maibe 2020 ita mak sei responsabiliza rasik hodi selu profesór kontratadu ne’e,” haktuir manorin na´in ne´e.

Tuir Verdial katak durante fulan neen nia halo observasaun ba prosesu ensinu aprendijazen iha área informatika nian kuaze estudante lubuk ida mak iha ona koñesemenru diak oinsá atu utiliza programa informatikan iha área komputadór nian. Signifika, abilidade estudante sira nian ne’e mosu husi sistema manorin ne’ebé diak. Ne’e hatudu katak eskola kontinua kontrata profesór ne’e tanba iha esperiénsia no kapasidade di´ak iha sistema informatika ne’e.

Tanba ne’e 2020 prosesu kontratu ba profesor ne’e realiza konsidera nu´udar faze dahuluk ba eskola 5 de Maio hatudu ninia responsabilidade ba manorin sira. Entertantu, totál profesór sira iha ESG 5 de maio hamutuk 54; permanente 46 no voluntáriu 14.

Notísia relevante:ESG 5 de Maio Sei Limita Inskrisaun Númeru Estudante

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here