Sekretáriu Estadu Ambiente, Demétrio do Amaral de Carvalho. Imajen Tatoli/Egas Cristovão

DILI, 25 novembru 2019 (TATOLI) – Sekretáriu Estadu Ambiente (SEA), Demétrio do Amaral de Carvalho, informa empreza MURA Technology daudaun ne’e halo mobilizasaun bá rekursu finanseiru, molok instala fábrika teknolojia CAT-HTR hodi transforma plástiku ba óleu.

CAT-HTR mak teknolojia inovadora ne’ebé transforma plástiku ba óleu ne’ebé inventa husi Thomas Maschmeyer, profesór kímika iha Universidade Sydney, Austrália, no daudaun implementa ona iha Inglaterra.

“Ha’u hatene katak ekipa MURA nian ohin loron hala’o hela mobilizasaun ba rekursu finanseiru, iha tempu liubá ha’u rona katak ekipa halo hela negosiasaun ho identidade balun atu apoia rekursu finanseiru ba implementa projetu ne’e, maibé seidauk hatama relatóriu progresu loloos husi kontaktu ne’ebé sira halo”, SEA Démetrio afirma ba TATOLI iha knaar fatin Bebora, ohin.

Sekretáriu Estadu ne’e dehan Governu Timor-Leste hatudu nafatin kompromisu no aseitamentu ba teknolojia resiklajen atu empreza ne’e instala fábrika hodi transforma plástiku ba óleu  dezde país ne’e asina kontratu ho Mura iha maiu liubá.

Nia dehan husi akordu ne’ebé halo ho empreza MURA mak mobilizasaun ba rekursu finanseiru no Governu Timor-Leste ninia responsabilidade mak aloka rai hodi halo estudu viabilidade finál ba investimentu ida ne’e.

“Husi ita-nia parte ita ko’alia ona ho ministériu relevante (Ministériu Justisa) sira atu ita dezigna terrenu (rai) para depois fábrika ne’e bele instala iha Timor-Leste”, katak.

Démetrio adianta projetu ne’e tuir inísiu hateten katak iha faze rua hanesan komersiál no faze ida naun komersiál. “Ne’e signifika sira (MURA) prodús ka halo resiklajen ba óleu, maibé la’ós komersiál ne’e ita presiza osan millaun $2 atu finaliza ninia estudu viabilidade no mós karik ba investimentu ho komersiál presiza osan kuaze millaun $40-resin”, afirma.

Memorandu entendimentu (MoU, sigla inglés) ne’e kesi Governu Timor-Leste no empreza MURA no Thomas Maschmeyer, profesór kímika iha Universidade Sydney, Austrália.

“Agora, ita hein sira husi MURA atu hahú mobiliza rekursu finanseiru para ita bele arranka ba formasaun”, espera.

Eis Deputadu Parlamentu Nasionál ne’e dehan Governu Timor-Leste mak haruka nia ema sira ba formasaun iha Universidade Sydney, liuliu dezenvolve kapasidade, maibé orsamentu ba SEA ki’ik liu ne’ebé seidauk bele kobre ba investimentu boot sira.

MoU ne’ebé asina ona ne’e importante tebes ba Timor-Leste hodi asegura dezenvolvimentu ekonómiku ida sustentavel hodi lori Timor Leste livre husi lixu plastiku ne’ebe oras ne’e sai preokupasaun boot tebes ba Governu inklui komunidade ein jerál.

Asinatura MoU ne’e hala’o iha aula Sydney University, Austrália, iha 17 maiu 2019, ne’ebe partisipa husi Embaixadór Timor Leste ba Austrália, Konsuladu Timor-Leste iha Sydney, reprezentante husi LICELLA, RESPECT no Vice Canceler Sydney University ne’ebé sai hanesan entidade implementadór programa resiklajen plástiku refere. Amstrong Energy no LICELLA mak na’in ba Empreza Mura.

Notísia relevante : MoU ho MURA Fó Dalan Hodi Hahú Buka Rekursu

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here