Xefe Bankada UDT/FM, Gilman Exposto dos Santos. Imajen/Tatoli

DILI, 25 novembru 2019 (TATOLI) – Xefe Bankada UDT/FM, Gilman Exposto dos Santos hakotu iis ho idade 63, ohin dader iha Ospitál nasionál Guido Valadares (HNGV-sigla portugués) tanba ataka kurasaun (kardiovaskular).

Xefe Departementu Banku Urjénsia HNGV, Nilton da Silva, konfirma família matebian lori Gilman ba ospitál iha tuku 7:15, ho kondisaun lakon konsiénsia ona.

Xefe Departementu Banku Urjénsia HNGV, Nilton da Silva. Imajen/Nelia Fernandes

“Husi dadus ne’ebé kolega sira rekolla no mós atende bainhira família sira lori mai, sinál vitál ba isin kuaze la responde hotu, entaun sira koko hodi halo primeiru sokoru ne’ebé iha fatin barak uza, no ami koko kuaze minutu 35 nia laran la iha responde buat ida. Nune’e, iha tuku 7:48 ami ninia ekipa deside hapara primeiru sokoru no deklara katak Señor Gilman exposto labele salva”, tenik Nilton iha ninia kna’ar fatin, segunda ne’e.

Nia dehan, normalmente konsiénsia normál ba ema iha 15 maibé bainhira família sira lori Gilman ba ospitál, ninia konsiénsia to’o de’it 3.

“Signifika katak bainhira to’o ospitál, ninia funsaun iha isin ein jerál kuaze la iha”, nia akresenta.

Nia dehan tan, ekipa koko ona atu halo posibilidade oioin maibé la konsege salva.

“Posibilidade boot moras hanesan ne’e bele dehan Kardiovaskulár, tuir istória matebian monu iha uma. Modelu hanesan ne’e dala barak halo ema mate derepente”, akresenta Nilton.

Gilman Exposto dos Santos, moris iha Suku Fatubessi, Postu Administrativu Hatolia, Munisípiu Ermera iha loron 4 jullu 1956, nu’udar Deputadu efetivu husi Bankada UDT/FM.

Matebian, kaben hosi Armandina Gusmão dos Santos, ne’ebé hanesan alin feto hosi Líder Nasionál, Kay Rala Xanana Gusmão.


Deputadu ne’e, hahú ninia funsaun hanesan reprezentante povu iha loron 18 jullu 2018, iha V Lejizlatura (2018 to’o 2023).

Deputadu Gilman hakotu iis iha loron dahuluk diskusaun no votasaun jeneralidade ba Orsamentu Jerál Estadu (OJE) 2020.

Nia mós nu’udar membru Komisaun A ne’ebé trata asuntu Konstitusionál no Justisa no mós membru Komisaun E ne’ebé trata asuntu Infraestrutura.

Iha vida polítika, Gilman Exposto hanesan Prezidente Partidu União Democrática Timorense (UDT), dezde fevereiru 2010 troka João Viegas Carrascalão.

Jornalista: Nelia Fernandes

Editór: Xisto Freitas

3 KOMENTÁRIU

  1. Hato´o ami nia sentido condolência ba Sr.Gilman Exposto, Deputado e presidente UDT nebe Fila ona Aman Maromak kadunan Santo.

Leave a Reply to Abilio Cancel reply

Please enter your comment!
Please enter your name here