Banda Arco-Íris

DILI, 24 novembru 2019 (TATOLI)—Iha momentu ne’ebá, laiha stúdio múzika. Bainhira ami halo hela gravasaun ka gravasaun la’o hela mak derrepente asu hatenu, ami tenke para ka hapara gravasaun. Bainhira grava namamas hela mak aviaun semo iha lalehan ne’ebá mak nia lian makaas, ami tenke para uitoan hafoin grava hikas fali.

Grupu banda Arco-Íris

Kle´ur fahe malu, ohin, sira hakarak moris hamutuk fali. Kleur sira la hamutuk kaer hamaus ekipamentus múzika hodi toka halimar, ohin, sira hamutuk mout iha rítmu ai-knananuk ida-nian hodi toka hamutuk. Kleur sira la soran lian hodi hananu hamutuk, ohin, sira lia ida hakarak hananu hamutuk hodi halian sira-nia múzika nia kmanek no sira-nia lian nia furak ne’ebé too ohin loron nunka mate.

Hafoin tinan 35, hahú husi harii Grupu Múzika Arquiris Band iha Jullu 1984, inisiadór no fundadór Arquiris Band, José Cameirão, iha mehi halibur hamutuk fali membru sira husi grupu múzika lendáriu “Arquiris Band” atu promove fali sira-nia múzika antiga sira ne’ebé sira hakerek no hananu iha périodu 1984—1987 liubá ne’e.

Membru banda Arco-Íris

Atu realiza mehi kmanek ida ne’e, iha komemorasaun Proklamasaun Independénsia 28 Novembru ba dala-44 (28 Novembru 1975—28 Novembru 2019), sira sei hala’o konsertu múzika ho tema “Mai Haksolok Hamutuk ho Ai-Knananuk Memória Arquiris 84” ne’ebé tuir planu sei hala’o iha Jardin BJ Habibie Bidau, iha 28 Novembru 2019 iha tuku 18.00—ramata.

“Loos! Tanba iha tempu naruk la hasoru malu entaun aproveita tempu ne’ebé iha, ami hamutuk fali hodi toka fila fali múzika sira ne’ebé orijinál. Ami sei toka no hananu ami-nia múzika rasik. Ami mós ho inisiativa rasik hakarak anima komunidade Timor-Leste no fans Arquiris Band nian iha loron 28 Novembru, iha Jardin BJ Habibie, Bidau, Dili,” dehan Jerente Grupu Arquiris Band, José Cameirão, ba Ajénsia TATOLI liuhusi entrevista via rede sosiál, domingu (24/11/2019).

Atu utiliza fatin ne’e, nia hakatuir, sira hetan ona autorizasaun eskrita ka hetan karta autorizasaun husi Agencia de Desenvolvimento Nacional (AND) hodi bele utiliza Jardin BJ Habibie. Iha konsertu ne’e, nia onestu, sira la tane liman ba Governu Timor-Leste hodi hetan apoiu orsamentu ruma maibé sira hetan apoiu husi soponsor úniku mak emprezariu timoroan ida husi Kompañia Rudal 9784 “MAHOKA”.

“Objetivu husi konsertu ne’e mak hakarak anima komunidade ho ami-nia múzika liuliu sira ne’ebé idade hanesan ho ami, atu lori sira bele relembra múzika sira uluk nian ne’e no liga ba komemorasaun loron Independensia 28 Novembru tinan ida ne’e. Tanba ne’e mak ami foti tema ba konsertu ne’e ‘Mai haksolok hamutuk ho Ai-knananuk Memória Arquiris ’84’ tanba durante ne’e, liuliu jerasaun foun rona de’it ami-nia múzika maibé la koñese ami no na’in ba Arquiris Band ’84 ne’e mak sé-sé,” nia dehan.

Iha konsertu múzia refere, nia konvida fans no populasaun sira iha Dili atu asiste sira-nia konsertu no bele haksolok hamutuk ho sira hodi hananu sira-nia múzika tuan sira ne’ebé to’o oras ne’e nunka mate ho tempu ida-nia kbiit. Maske halo ona tinan 35 maibé sira-nia múzika tuan sira ne’e sempre moris nafatin iha jerasaun tuan no foun sira-nia tilun.

“Ami sei hananu múzika lubuk ida husi ami-nia Album Arquiris ’84-87. Múzika sira mak hanesan Mundo Kabuar, Osan, Tanba Ó Murak Rai, Oan kiak, Haraik Aan, Dili Cidade, Ita Ema Moris, Terus Mak Ha’u Terus, Moris Loron Balun, Mai Hotu Hotu, Dehan Loos Mai, Batar Tema, Ina lou, Loro Lorosa’e, nó múzika selu-seluk tan ne’ebé hamutuk múzika 25,” nia informa.

Iha konsertu múzika ne’e, nia haklaken, sei aprezenta personil ka membru tuan husi Atquiris Band mak Tonny Pereira hanesan Lead Vocal no Guitar Lead, Dinus Quito kaer Bass, José Cameirão kaer Drum, Anitos Matos mak lead vocal. Nia dehan, temi membru sira ne’e nia naran, la sente, lori nia hanoin fali esperiénsia sira bainhira sira hamutuk halo gravasaun ba múzika hirak ne’e.

“Iha momentu ne’eba, laiha studio múzika. Bainhira ami halo hela gravasaun ka gravasaun la’o hela oha uma laran mak derepente asu hatenu, ami tenke para ka hapara gravasaun. Bainhira grava namamas hela mak aviaun semo iha lalehan ne’eba mak nia lian makaas, ami tenke para oituan hafoin grava hikas fali,” José Cameirão haktuir hodi hanoin hikas fali esperiénsia sira ne’eb’e sira hetan iha tempu uluk.

Nia dehan, atu halo konsertu ne’e sai furak no fó apresiasaun be klean ba membru tuan sira be balun mate no balun hela dook, sei trika iha mós ho personil foun sira mak Vitorino Lopez hanesan guitar ritmu hodi substitui matebian Franscisco Gama (Siku Gama), Amaco Maulapa organista substitui Elias Freitas tanba kondisaun saúde la favoravel no Thalia Gonçalves substitui hela Piki Pereira tanba agora daudaun Piki iha Portugal labele mai.

Nia esplika, grupu Múzika Arquirs Band ne’e sira harii iha Dili iha fulan Jullu tinan 1984. Husi harii to’o tinan 1987, sira-nia grupu konsege produs album múzika neen (6). Iha tinan 1984, sira hatolun album múzika rua mak “Abia” no múzika Pop Natal ida. Iha tinan 1986, sira podus album múzika rua mak “Dehan Loos Mai” no “Ina Lou”. Iha tinan 1987, sira halekar tan album múzika rua ne’ebé mak grava iha Studio Sangsaka Record Jakarta-Indonesia ne’ebé mosu ho múzika favorite mak “Batar Tema” no “Helele Helela”.

“Tanba ne’e, iha konsertu múzika ba komemorasaun loron Independénsia 28 Novembru ne’e, ami konvida timoroan tomak atu mai asiste ami-nia konsertu iha Jardin BJ Habibie, Bidau, Dili, iha 28 Novembru 2019 iha tuku.18.00—ramata. Imi-nia suporta ma kami-nia ksolok no imi nia domin mak sei promove múzika tuan sira sei buras no moris nafatin husi jerasaun ida ba jerasaun ida seluk. Ami hein ita-boot sira-nia prezensa,” dehan José Cameirão ho esperansa be nakonu. Mai, ita ba asiste!

Jornalista: Cancio Ximenes

Editór: Rafi Belo

 

HAKEREK NO HATÁN

Please enter your comment!
Please enter your name here