Prezidente Repúblika, Francisco Guterres Lú Olo, kondekora jornalista funu, Max Stahl, ho Colar Ordem Timor-Leste. Imajen Mídia PR

DILI, 22 novembru 2019 (TATOLI)–Prezidente Repúblika (PR), Francisco Guterres Lú Olo, ho inisiativa rasik deside kondekora Max Stahl ho Colar Ordem Timor-Leste tanba rekoñese servisu ho méritu estraordináriu ba Timor-Leste, iha ámbitu hakerek iha artigu 2 husi Dekretu-Lei númeru 20/2009, 6 maiu, ne’ebé define kondisaun elijibilidade atu fó Ordem Timor-Leste.

Iha diskursu, Prezidente Repúblika hateten Estadu Timor-Leste hato’o ninia rekoñesimentu ba buat hotu ne’ebé Max Stahl halo ba rai no povu Timor-Leste (TL) hanesan jornalista, repórter-funu nian, formadór, peskizadór, produtór filme no istoriadór.

“Nu’udar defensór kauza no valór, ami haree ba ó (Max Stahl) hanesan kompañeiru ida-ne’ebé ami hotu presiza tebes iha prosesu tahan pasadu, prezente no futuru Timor-Leste nian! Obrigadu ba buat hotu ne’ebé ó halo, irmaun! Obrigadu tanba fó mai ami janela oportunidade barak atu haboot-an ba beibeik nu’udár povu no nasaun. Timor-Leste mós ó-nian no ba sira hotu ne’ebé besik ó”, Xefe Estadu hateten.

Lee mósEstadu Kondekora Max Stahl ho Grau Colar Ordem Timor-Leste

PR Lú Olo hatutan katak ho ninia inisiativa rasik no ho responsabilidade tomak, ho povu no Estadu Timor-Leste nia naran, kondekora belun ida iha tempu naruk nian, Max Stahl, ho Colar Ordem Timor-Leste.

“Ha’u halo ida-ne’e ohin, ho emosaun kle’an, ba rekoñesimentu ba buat hotu ne’ebé belun ne’e halo to’o ohin loron ba nasaun no povu ida-ne’e. Belun ne’e mós tulun ita kore-an hosi dominasaun estranjeira kruel ida. Serimónia investidura, hala’o iha fatin ida-ne’e, iha Palásiu ida-ne’ebé lori naran erói nasionál boot ida ninian, Prezidente Nicolau Lobato, ho sasin no apoiu husi órgaun soberania tomak, eis-titulár órgaun soberania no ho entidade barak no mós ho reprezentante husi konfisaun relijioza sira no husi sosiedade sivíl”, Prezidente Repúblika haklaken.

Iha oportunidade ne’e mós Xefe Estadu agradese espoza, oan no amigu no kolega Max Stahl ne’ebé mai horik hamutuk hodi partisipa iha serimónia ne’e.

Xefe Estadu konsidera serimónia ida-ne’e iha importánsia espesiál ba ema hotu-hotu ne’ebé luta ho aten-barani no, ho determinasaun ba Timor-Leste, nu’udar devér ida atu serbí pátria no povu.

Lú Olo konta tuir katak Max Stahl nia envolvimentu hahú husi 30 agostu 1991, subar-an nu’udar turista, tama iha Timor-Leste ho misaun espesiál atu filma ba dokumentáriu ida ba televizaun independente Yorkshire, Inglaterra, atu buka no fó-hatene buat hotu-hotu ne’ebé la’o iha lidun ida izoladu husi mundu, okupadu husi forsa militár boot ida maibé ho rezisténsia ida organizada no metin tebetebes. La’ós ba dahuluk mak Max filma situasaun funu nian.

“Tuir Max rasik hateten, nia sente iha tempu ne’ebá, katak nia hala’o ninia knaar iha ambiente opresaun boot ida nia laran. Nia sente katak buat ruma espesiál bele akontese. Maibé, nia tenke sai husi Timor-Leste tanba problema vistu maibé filafali mai liuhusi fronteira-rai. Entretantu, nia konsege ba ai-laran no entrevista guerilleiru balun hanesan Konis Santana, iha tempu ne’ebá nu’udar Vise-Sekretáriu Comissão Directiva da FRETILIN, iha 1 outubru 1991, iha Tatamailau, no Sub-Xefe Estadu Maiór FALINTIL, David Alex, iha novembru 1991, iha Samalari, Baucau. Nia filma no halibur dadus ne’ebé nia konsege hetan kona-ba ita-nia luta”, Prezidente Repúblika relembra.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here