Max Stahl. Imajen Mídia PR

DILI, 22 novembru 2019 (TATOLI)–Hafoin simu kondekorasaun Ordem Colar de Timor-Leste, jornalista Max Stahl agradese ba Prezidente Repúblika no povu Timor-Leste, tanba bele rekoñese ninia luta ba dignidade ema-nian iha tempu naruk nia laran.

“Ha’u agradese ba Prezidente Repúblika, tanba ho inisiativa hodi fó kondekorasaun ba ha’u, tanba ha’u mai iha Timor, buka istória no luta ba umanidade. Ha’u mós aprende buat barak kona-ba realidade moris husi maluk timoroan sira”, nia agradese.

Nia konta tuir katak durante hasoru malu ho timoroan sira, nia aprende kona-ba dignidade, tanba liafuan ne’e ema barak uza iha tempu luta. Tanba de’it liafuan ne’e mak ema barak mós prontu atu mate.

Max Stahl dehan nia hamutuk ho timoroan sira aprende kona-ba oinsá luta ba dignidade ho korajen, aten barani, ikusmai hetan duni liberdade no sai hanesan nasaun independente iha Sudeste Aziátiku.

Lee mós: Max Stahl Servisu ho Méritu Estraordináriu

“Filme ne’ebé ha’u halo la’ós tanba imajen furak, maibé tanba dignidade, no husi imajen ne’e mak mundu mós rekoñese. Iha momentu ne’ebá, ha’u hala’o knaar hanesan jornalista. Ha’u mós ta’uk kilat atu kona iha parte ne’ebé. Ha’u haree soldadu sira, militár Indonézia nian barak tebes komesa tiru maluk timoroan sira, oho, no baku”, nia haktuir iha Palásiu Prezidente Nicolau Lobato, Bairru Pité, Dili, sesta ne’e.

“Iha momentu ne’ebá, ha’u imajina de’it ha’u-nia an mós hanesan forsa ida. Nune’e, iha ha’u nia hanoin katak, hanesan forsa ida, iha funu laran ha’u tenke hala’o servisu. Tanba, iha funu laran mak forsa ida la hala’o nia knaar, ne’e perigu tebes. Tanba ne’e, ha’u ho aten barani hala’o ha’u-nia knaar, hodi hala’o servisu jornalístiku, halo filmajen no prodús hodi fó sai ba mundu”, nia salienta.

Iha fatin hanesan, Diretór Ezekutivu Centro Nacional Chega, Hugo Maria Fernandes hateten Prezidente Repúblika fó kondekorasaun ida-ne’e bazeia ba Max Stahl ninia kontribuisaun ba Timor.

“Órden ida-ne’e okupa grau aas liu entre órden hotu-hotu ne’ebé Estadu ne’e iha no oferese ba kualker sidadaun tantu husi rai-laran no rai li’ur ne’ebé fó ninia kontribuisaun aas ba luta libertasaun nasionál “, nia haklaken.

Hugo hato’o parabéns ba Max Stahl tanba kondekorasaun iha ámbitu hakerek iha artigu 2 husi Dekretu-Lei númeru 20/2009, 6 maiu, ne’ebé define kondisaun elijibilidade atu fó órden Timor-Leste.

Nia esplika dekretu ne’e mós hateten katak vídeo Masakre Santa Cruz, 12 Novembru 1991, rejistu tiha ona iha memória UNESCO nian, katak rekoñesimentu husi mundu tomak iha ona.

UNESCO hanesan organizasaun ONU ne’ebé haree kona-ba patrimóniu kulturál no Timor-Leste presiza mós atu prezerva vídeo orijinál ne’ebé oras ne’e sai hanesan propriedade intelektuál Max Stahl nian.

“Ita presiza atu prezerva ninia vídeo orijinál, ne’ebé oras ne’e espalla tiha ona iha mundu tomak, no atu entrega ka la entrega ba Estadu, ne’e direitu tomak husi Max Stahl”, nia subliña.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here