Kristu Liurai, Letefoho. Imajen/António Gonçalves

DILI, 22 novembru 2019 (TATOLI)-Padre Pároku Sagradu Korasaun de Jesus, Becora, nu’udar mós inisiadór ba harii Estátua Kristu Liurai, Letefoho, Domingos Soares “Maubere”, hateten,  inisiativa  leigu sira ho sarani Letefoho tau estátua Kristu Liurai iha laletek Letefoho nian nu’udar sinál atu bolu atensaun ba sarani sira hodi hateke mai foho leten no hateke ba Lalehan atu hakribit sala.

Notísia Relevante : Estátua Cristo Liurai Kontribuisaun Hosi Sarani Letefoho

Iha Letefoho, Munisípiu Ermera, sarani sira, inklui joven sira hola inisiativa tau ai-krús bar-barak iha kuaze foho tutun sira iha area Letefoho nian atu bolu atensaun ba sarani sira hametin fiar nu’udar sarani kristaun.

Ba Ajénsia TATOLI iha ninia rezidénsia, Becora, Dili, Amu Domingos “Maubere” fó sasin, iha foho Kailiklau nu’udar fatin ida estratéjiku hodi hateke tuun mai Letefoho no hosi Letefoho bele hateke ba leten kona Kristu Liurai.

“Kuandu ita hakarak ba hasoru Kristu Liurai entaun ita liuhosi dalan karidade nian. Karidade nian katak ita hakribit diabu iha fatin aas no hakribit satanás ne’ebé uluk dada Adão ho Eva hodi monu ba sala,” Amu Domingos hateten.

Nia hatutan, bainhira sa’e ba Kristu Liurai, to’o iha eskada klaran hakerek iha ne’ebá hatete keta loko aan, keta halo korrupsaun, keta kan-tén, katak ita komesa sama no soe ba kotuk para ita moos mak ba hasoru Jesus Liurai.

Amu Maubere dehan, sarani sira Letefoho iha prinsípiu ida katak tau Kristu Liurai iha foho hodi ema hotu bele hateke ba Maromak.

“Ami iha prinsípiu ida ne’ebé mak mai hosi kedas antigu testamentu  depois ita-nia bei’ala sira hotu. Ami ho hanoin ida katak foho leten ita tau sinál salvasaun nian ne’ebé sinál salvasaun mak Krús,” Amu Maubere tenik.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here