Sekretária Jerál Parlamentu Nasionál, Cedelizia Faria dos Santos. Imajen Mídia UNESCO.

DILI, 22 novembru 2019 (TATOLI)—Konsellu Administrasaun Parlamentu Nasionál, sesta ne’e, aprova fixa hodi halo avaliasaun ba dezempeñu asesór nasionál no internasionál ne’ebé durante ne’e apoia Parlamentu Nasionál.

Konsellu Administrasaun extraordinária ne’e lidera hosi Prezidente Parlamentu Nasionál, Arão Noé de Jesus da Costa Amarál.

“Durante ne’e ita seidauk iha fixa hodi halo avaliasaun ba ita-nia asesór nasionál no internasionál sira. Tanba ne’e mak ohin Konsellu Administrasaun tuur hamutuk iha reuniaun extraordinária ne’e no fixa ida-ne’e aprova ho votu maioria”, Sekretária Jerál Parlamentu Nasionál, Cedelizia Faria dos Santos, ba jornalista sira iha Parlamentu Nasionál, hafoin enkontru.

Nia haktuir, iha enkontru ne’e ko’alia kona-ba kontratu asesór balun ne’ebé hala’o hela serbisu entre fulan maiu to’o juñu 2019 maibé seidauk iha kontratu.

Cedelizia esplika, lei fó dalan retroativu entaun Konsellu Administrasaun aprova hodi kontrata filafali asesór ida-ne’e. Nia seidauk bele fó-sai asesór ne’e nia naran ho ninia saláriu.

Nia dehan, atu extende kontratu presiza avalia serbisu asesór sira-nian. “Semana oin ekipa avaliasaun sei avalia tantu asesór nasionál no internasionál sira-nia serbisu”, nia katak.

Sekretária Jerál PN ne’e fó-sai katak asesór ne’ebé durante ne’e apoia PN hamutuk 21, kompostu hosi nasionál 11 no internasionál 9. Cedelizia lakohi relata saláriu ba asesór nasionál no internasionál tanba sijilu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here