Komunidade balun iha Nahareka uza solár panél (tenaga surya) tanba seidauk asesu eletrisidade. Imajen TATOLI/Cipriano Colo

VIQUEQUE, 22 novembru 2019 (TATOLI)–Populasaun iha Suku Nahareka, Postu Administrativu Ossu, Munisípiu Viqueque, kontinua sunu kamii iha tempu kalan tanba instalasaun eletrisidade seidauk to’o iha suku ne’e. 

“Suku Nahareka to’o oras ne’e eletrisidade seidauk tama. Iha kompaña oioin mak mai sukat, maibé to’o agora buat ida laiha. Ami-nia oan sira kalan atu estuda ladi’ak. Ha’u-nia populasaun maioria sunu kamii no uitoan liu mak uza solár panél (tenaga surya)”, Xefe Suku Nahareka, Paulino Alberty Ximenes, hato’o asuntu ne’e iha Sede Suku Nahareka, sesta ne’e.

Autoridade lokál ne’e deklara katak komunidade iha suku ne’e sempre prontu atu kolabora ho Estadu hodi simu kualker programa liga ho dezenvolvimentu suku, inklui projetu eletrisidade iha suku ne’e.

Tanba ne’e, tuir nia, bainhira Estadu hanoin atu halo instalasaun eletrisidade, komunidade absolutamente sei kolabora tanba suku ne’e sei hela iha nakukun laran.

“Ha’u rekomenda ba Estadu atu hanoin netik ami. Bele karik tau ona iha planu ka programa nune’e ami bele hetan naroman iha tempu kalan”, autoridade lokál ne’e rekomenda.

Nune’e mós, abitante husi Bairru Lita ho naran Vasco (68), haktuir iha tempu bailoron hamutuk ho nia oan sira ba hili kamii tuku ho kabas no kumu hamutuk iha kesak, hafoin habai maran mak bele uza hodi sunu iha tempu kalan.

“Ami iha ne’e dook husi vila. Tanba ne’e, ami susar atu hola solár panél atu bele uza iha tempu kalan”, nia konta tuir.

Nune’e mós, Diretór Interinu Eskola Ensinu Báziku Sentrál Primeiru no Segundu Síklu Nahareka, Guido Sequeira durante serimónia entrega karteira husi Prezidénsia Repúblika ba eskola ne’e, rekomenda ba Prezidente Repúblika, Francisco Guterres Lú Olo atu ko’alia ho Governu hodi aselera prosesu instalasaun eletrisidade iha suku ne’e tanba to’o oras ne’e seidauk asesu eletrisidade.

“Ami-nia problema boot ida maka to’o agora seidauk asesu eletrisidade. Ami rekomenda ba Prezidente Repúblika nu’udár aman nasaun, atu ko’alia ho Governu nune’e tau-matan netik ba ami iha área rurál”, profesór ne’e rekomenda.

Populasuan Suku Nahareka hamutuk 2.225 ho totál uma-kain 600, mai husi aldeia lima hanesan Makabu’u, Maurate, Darenau, Saborogo no Raila’a.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here