Prezidente Autoridade Munisípiu Manufahi, Arantes Isaac Sarmento. Imajen/Egas Cristovão

DILI, 22 novembru 2019 (TATOLI) –Atu bele iha atendimentu ida efikásia no efisiénsia liu ba povu nia interese iha baze, maka Governu sentrál ne’ebé lidera hosi Primeiru-Ministru (PM), Taur Matan Ruak, presiza foku ona ba implementasaun polítika desentralizasaun.

Notísia Relevante : KFP Realiza Semináriu Jestaun Rekursu Umanu

Prezidente Autoridade Munisípiu Manufahi, Arantes Isaac Sarmento, hateten, atu bele servisu desentralizasaun nian di’ak, presiza tebes rekursu umanu ida kualidade.

 “Ha’u hanoin Komisaun Funsaun Publika  (CFP-sigla portugés) sei hato’o ba Primeiru-Ministru atu bele haree polítika desentralizasaun ho jestaun rekursu umanu ne’ebé iha kualidade atu bele halo servisu,” afirma Arantes Isaac Sarmento, bainhira remata semináriu ne’ebé organiza hosi KFP iha Sentru Konvensaun Dili, sesta (22/11/2019).

Nia dehan, iha Munisípiu Manufahi iha funsionáriu nain tolu de’it fó kompeténsia ba sira hodi hala’o servisu liña ministeriál sira seluk atu fó atendimentu liu-liu ba nesesidade bázika loroloron nian inklui mós ba kazu sira ne’ebé mak grave, ikus mai povu la hakilar ona.

Kona-ba rekursu umanu nia parte rekoñese katak menus, maibé preparadu hela atu hala’o servisu iha kualkér tempu, bainhira Governu sentrál fó ona kompeténsia ba sira.

Iha biban ne’e, nia parte mós rekomenda ba KFP katak la presiza haree ba mapa pesoa, maibé tenke define ona mapa estruturál. Tanba, durante ne’e kona-ba prosesu rekrutamentu ida-idak halo ninia hakarak no la haree ba nesesidade iha munisípiu inklui mós postu administrativu sira.

Iha biban hanesan, Pe. Martinho Gusmão, mós hato’o ninia kritika balun ba KFP katak prosesu aprezentasaun ko’alia kona-ba desentralizasaun foka ba administrasaun publika. Maibé, buat seluk mak kona-ba podér lokál la iha relasaun ho Governu lokál. Tanba iha konstituisaun la iha liafuan kona-ba Governu lokál ho razaun konstituisaun kopia hosi Portugal no Mozambique nian, hakerek liafuan Governu lokál. Maibé, iha Timor la iha Governu lokál no ba liu kedas podér lokál.

“Buat ne’ebé mak komisáriu Funsaun Publika ko’alia barak liu mak Governu lokál   eziste, maibé depois iha ninian esplikasaun no afirmasaun governu lokál la eziste  tanba ministru haruka ninia delegasaun manda ninia aan rasik, administradór munisípiu labele manda ne’e mak konsidera konfuzaun,” tenik Amu Martinho.

Hatán ba kestaun sira ne’e, Komisáriu Portfolio Forsa Servisu, Formasaun no Sigap, José Telo  rekoñese katak iha servisu delega ona ba munisípiu, tantu autoridade munisipál no mós administrasaun munisipál.

“Estrutura orgánika liña ministerial sira ne’ebé delega servisu la iha estrutura klaru iha munisípiu. Iha balun ho funsionáriu nain ida ka rua de’it. Oinsá sira bele ezekuta servisu ne’ebé delega bá,” hateten José Telo.

Nia hatutan, kona ba jestaun rekursu umanu sei sentraliza iha Governu sentrál. Munisípiu balun iha ona podér rekruta ajente administrasaun publika no kazuaís. Maibé kestaun deskrisaun servisu la klaru ou laiha. Tanba laiha vontade polítika atu kria instrumentu legais hodi rezolve kestaun hirak ne’e.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here