Prezidente Autoridade RAEOA-ZEEMS, José Luís Guterres ‘Lugu’. Imajen Tatoli/António Gonçalves

DILI, 22 novembru 2019 (TATOLI)- Prezidente Autoridade RAEOA (Rejiaun Administrativu Espesial Oecuse-Ambeno, José Luis Guterres “Lugu” preokupa ho edukasaun iha rai ketan Oe-cusse. Tan ne’e ninia planu importante ida mak profesór sira iha ne’ebá tenke hetan formasaun ida aselerada liután.

“Ita sei hahú ho formasaun ida di´ak ba profesór sira no mós buka atu trata sira-nia kondisaun ho di´ak no dignu atu nune ita bele haree povu Oe-cusse oan sira asesu di´ak liután ba edukasaun,” garante Prezidente Lugu perante media iha salaun enkontru Ministériu Edukasaun no Juventude (MEJD), Vila Verde, ohin.

Prezidente Lugu hateten, depois nia asumi kna’ar ida ne’e preokupasaun dahuluk nia foka uluk ba área edukasaun. Tanba ne’e liuhusi enkontru kortezia ho Ministra Dulce de Jesus Soares, ne’e atu hetan esplikasaun ida detallada hodi nune’e nia bele kontinua dudu di´ak liután edukasaun iha Oecuse .

“Ha’u-nia preokupasaun ne’e sei hahú dahuluk ho ekipa jurídiku ne’ebé iha koñesementu ba área edukasaun inklui espesialista adversáriu ida atu ami bele haree hamutuk saida los mak ami tenke halo ona iha ne’ebá (Oe-cusse)”, friza Lugu.

Autoridade RAEOA ne´e afirma katak agora nia seidauk bele públika programa prioridade ba tinan haat nian maibé, tuir Lugu, presiza ajusta didi´ak no akompañia uluk situasaun reál iha RAEOA atu nune’e saida mak nia trasa bele lori benefísiu ba povu Oe-cusse.

“Ha’u presiza akompañia lai no apar uluk ho situasaun iha RAEOA atu nune’e planu prioridade ne’ebé mak trata bele iha duni ninia rejultadu ba povu Oecuse”.

Portantu liuhusi informasaun ne’ebe mak nia hetan husi Ministra Edukasaun, Juventude no Desportu, Dulce de Jesus Soares, nia sei ajusta iha viajen ba Oe-cusse atu haree besik liután hodi nune’e tinan haat ne’ebé nia asume bele rezolve problema sira ne’e.

Notísia relevante:Dulce-Lugu Diskute Mekanizmu Hadi´a Kualidade Edukasaun Iha RAEOA

Jornalista :Tomé Amado

Editór     : Rafy Belo

HAKEREK NO HATÁN

Please enter your comment!
Please enter your name here