Diretór Jerál Turizmu, José Filipe Dias Quintas. Imajen/Tatoli Egas Cristovao.

DILI, 22 novembru 2019 (TATOLI) – Diretór Jerál Turizmu Ministériu Turizmu Komérsiu no Indústria (MTCI, sigla portugés), José Filipe Dias Quintas, hatete bazeia ba dadus, feto-maluk pur volta porsentu 45 hatudu pasu pozitivu iha dezenvolvimentu indústria turizmu iha Timor-Leste (TL).

“Ami haree katak agora ne’e, ita-nia feto-maluk barak mak halo negósiu iha setór turizmu, hanesan iha artezanatu, alojamentu, restaurante”, José Quintas afirma iha Hotel Timor iha ámbitu diskusaun jéneru iha indústria turizmu iha Timor-Leste, ohin.

Nune’e, MTCI esforsu fó kapasitasaun ba sira liuliu iha abilidade no koñesimentu hodi sira mós bele dezenvolve sira-nia aan iha indústria ne’e.

Quintas dehan Governu haree ona importante tebes oinsá iha setór ne’e, MTCI bele dudu feto maluk sira atubele envolve maka’as liután.

Iha diskusaun ne’e, Governu liuhusi MTCI ho parseiru internasionál UN Women loke debate hodi fó importánsia ba feto ne’ebé iha papél importante atu dezenvolve indústria turizmu.

Ministériu Turizmu ho UN Women koopera hodi halo diskusaun ida oinsá haree feto maluk sira-nia papél iha indústria turizmu tuir pontu lima iha Objetivu Dezenvolvimentu Sustentavel (ODS).

Meta ODS dalimak mak atinje igualdade jéneru no empoderamentu ba feto no labarik feto sira. Objetivu ida ne’e kona-ba hapara violénsia no diskriminasaun kontra feto no labarik feto sira no garantia katak sira iha oportunidade sira ne’ebé hanesan iha área sira hotu iha sira-nia moris.

“Ita haree Objetivu Dezenvolvimentu Sustentável iha objetivu dalimak ko’alia kona-ba igualdade jéneru no mós ho serbisu dignu no parseria ho feto sira hanesan xave importante ba dezenvolvimentu indústria turizmu iha Timor-Leste”, Diretór Jerál Turizmu dehan.

Iha fatin hanesan, Xefe UN Women iha Timor Leste, Sunita Caminha, dehan UN Women halo análize kona-ba aspetu jéneru iha indústria turizmu hodi feto bele kontribui ba dezenvolvimentu no estratéjia turizmu iha Timor-Leste.

Nia dehan, iha nivel globál UN Women hamutuk ho World Tourism Organization (UNWTO), foin lalais lansa relatóriu segundu kona-ba feto iha turizmu ba mundu tomak.

“Ida ne’e mós hatudu katak iha Timor-Leste mós oportunidade barak ba feto atu kontribui no hola lideransa iha setór turizmu”, katak nia.

Daudaun, UN Women iha ona faze analiza ba jéneru iha indústria turizmu Timor-Leste. “Diskusaun ohin mak oportunidade atu lori hamutuk parseiru husi Governu, sosiedade sivíl no parseiru dezenvolvimentu sira atu mai hamutuk atu haree idak-idak nia knaar bele kontribui no serbisu hamutuk hodi promove igualdade jéneru iha turizmu”, dehan.

Kona-ba dezenvolvimentu turizmu iha Timor-Leste, nia dehan : “Ami hare katak foin daudauk dadus ne’ebé iha husi forsa laborál Timor-Leste hatudu katak feto mak domina iha setór turizmu liuliu iha area akomodasaun no hahán”.

UN Women haree katak dadus ne’e refleta mós realidade nivel globál ne’ebé hatudu presiza investe maka’as liu iha feto atu partisipa no kontribui ba dezenvolvimentu turizmu.

“Se ita investe iha feto no haree barreira kona-ba feto sira enfrenta iha indústria turizmu, ita bele halo mudansa ba feto nia ekonomia rasik no mós ba komunidade no nasaun nia ekonomia tomak”, afirma.

Nia dehan investe iha promosaun igualdade jéneru inklui iha indústria turizmu bele kontribui ba nasaun atubele to’o nia objetivu relasiona ba ekonomia.

Governu Timor-Leste mós tenke tau importánsia atu haree katak bazeia ba barreira ne’ebé feto sira enfrenta iha sosiedade no iha família presiza halo investimentu diretamente hodi sira bele fó kontribuisaun másima tuir sira-nia direitu no tuir kompromisu ne’ebé Governu Timor-Leste halo hanesan deklarasaun Maubisse no seluk tan.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here