Prezidente Federasaun Kooperativa Kréditu Hanai Malu, Elizário Ferreira, ho ninia ekipa dada lia ho jornalista sira hafoin hasoru malu ho Xefe Estadu. Imajen/Julia Chatarina

DILI, 22 novembru 2019 (TATOLI) – Prezidente Federasaun Kooperativa Kréditu Hanai Malu, Elizário Ferreira, hala’o sorumutuk ho Prezidente Repúblika (PR), Francisco Guterres Lú Olo, hodi relata papél ne’ebé durante ne’e serví membru, sosiedade no nasaun liuhosi parte kooperativa kréditu nian, ne’ebé kontribui ba dezenvolvimentu ekonomia iha nasaun ninia liliu iha área rurál sira.

“Ba kooperativa kréditu ne’ebé maka halibur primáriu iha 87 no mós membru kooperante hamutuk ema na’in 12.89  halibur ona millaun $5,6, ne’ebé maka akomoda iha kooperativa iha territóriu tomak”, nia tenik iha Palásiu Prezidensiál, sesta ne’e.

Tuir Elizário Ferreira, kooperativa ekonómiku ninia atividade iha liña kréditu, maibé kréditu ne’ebé membru sira foti hodi halo atividade produtivu hanesan empréstimu atu halo kreativu família iha porsentu 40, kréditu fila liman hanesan kios, loke karpintária no seluk tan hamutuk porsentu 30 no porsentu 15 ba sira ne’ebé halo Guest House iha nível baze, kréditu ba saúde, ortikultura no mós ba edukasaun, maibé dominante liu maka ba kreativu nian.

Iha biban ne’e, nia relata mós kona-ba membru ne’ebé maka hola parte iha kooperativa no kona-ba aset.

“Ami husu kona-ba Nai Prezidente Repúblika atu mensiona ami nia kooperativa, tanba kooperativa ne’e parte ida setór ekonómiku. Nai Prezidente disponível tebes no agradese ba ami ninia prezensa, nune’e ami prontu atu kontribui no sei fó hanoin ruma ba Estadu atu bele kria kondisaun ne’ebé favorável ba povu atu hola parte iha vida kooperativa nian”, nia akresenta.

Nia dehan, kooperativa kréditu ne’ebé durante ne’e la’o, ninia kapitál mai hosi ninia membru sira no atividade ne’ebé membru sira hala’o hosi sira ninia osan rasik.

Elizário Ferreira subliña, iha situasaun ida ne’e, kompara ho tinan sira ba kotuk, situasaun ekonómikamente la’o ho di’ak maibé iha tinan ida ne’e hahú hosi maiu to’o fin outubru merkadu monu uitoan, ein termu kapasidade kompra menus no konsekuénsia hosi sirkulasaun moeda ne’ebé maka ladún to’o iha nível baze.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here