Prezidente Federasaun Kooperativa Kréditu Hanai Malu, Elizário Ferreira, ho ninia ekipa dada lia ho jornalista sira hafoin hasoru malu ho Xefe Estadu. Imajen/Julia Chatarina

DILI, 22 novembru 2019 (TATOLI)—Observasaun husi Federasaun Kréditu Hanai Malu hatudu katak hahú husi maiu to’o fin outubru tinan ne’e, ekonomikamente markadu rai-laran monu, kauza husi kapasidade kompra menus no sirkulasaun moeda la to’o iha baze. 

“Situasaun ekonomia iha Timor laran tinan-ne’e monu no situasaun ladún di’ak kompara ho tinan sira seluk. Iha tinan sira ba kotuk, ekonomikamente di’ak maibé tinan ida-ne’e hahú husi maiu mai too fin outubru no posibilidade to’o dezembru bele dehan merkadu monu”, Prezidente Federasaun Kréditu Hanai Malu, Elizário Ferreira dehan hafoin hasoru malu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Ho situasaun ne’e, kooperativa Hanai Malu hakarak informa ba Xefe Estadu kona-ba papél no kontribuisaun ba Estadu iha dezenvolvimentu ekonómiku.

“Ami mós husu ba Estadu atu mensiona mós ami-nia kooperativa hanesan parte ida husi setór kooperativa. Setór ida-ne’e hanesan setór ekonómika ida-ne’ebé prevee mós iha konstituisaun”, nia dehan.

Prezidente kooperativa ne’e ho fiar-an katak maski situasaun merkadu monu maibé kooperativa tenta hodi fó apoiu nafatin ba kliente ka koperante sira nune’e bele dezenvolve ekonomia hahú husi baze.

Dezde kooperativa ne’e harii to’o ohin loron, konsege halibur membru ka koperante hamutuk 1.2898 no halibur ona osan millaun $5.6

“Normalmente, tanba ida-ne’e kooperativa kréditu, nune’e nia atividade halao liu ba kréditu, maibé kréditu ne’ebé membru sira foti ba halo atividade sira ne’ebé bolu atividade produtivu hanesan kreativu familia iha 42%. sira ne’ebé fila liman,loke kios, loke karpintaria no seluk tan 30% no 15% ba sira ne’ebé halo uma guest house iha nivel baze, kréditu ba saúde, hortikultura no mos edukasaun”, nia relata tan.

Kona-ba ne’e, nia haktuir, Xefe Estadu agradese ba kooperativa nia prezensa no prontu atu kontribui liuhusi fó hanoin ruma ba Estadu, nune’e bele kria kondisaun ne’ebé favorável ba povu atu bele hola parte iha vida kooperativa.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here