Ekipa Apoia Juridiku MRLAP hamutuk ho autoridade sira Munisípiu Lautem halo konsultasaun públika iha Lospalos Vila, kuarta (20/11/2019). Imajen/Nelson de Sousa

LOSPALOS, 21 novembru 2019 (TATOLI)- Koordenadór Programa no Asesór Sósiu Kultura Ministériu Reforma Lejizlatura no asuntu Parlamentár (MRLAP), Josh Trindade, hateten, polítika governu atu halo uniformizasaun lei kostumeiru no justisa tradisionál ho lei formál nu’udar parte ida atu haforsa sektór justisa formál.

Notísia Relevante :MRLAP Hala’o Konsultasaun Públiku ba Lei Kostumeiru ho Justisa Tradisionál iha Iliomár

Josh Trindade hato’o asuntu ne’e iha ámbitu konsultasaun públiku lei kostumeiru no justisa tradisionál ho autoridade lokál no lian nain sira dalen Fataluku iha salaun Administrasaun Munisipiu Lautem, kuarta (20/11/2019).

Oitavu governu, informa Josh Trindade, iha prontidaun hakarak haree fila-fali justisa tradisionál atu nune’e bele ajuda hodi kompleta justisa formál. Nune’e, bele kontribui redús númeru kazu ne’ebé pendente barabarak iha tribunál.

Nia dehan, hosi  konsultasaun públika kona-ba Lei Kostumeiru ho Justisa Tradisionál nu’udar parte ida atu ekipa MRLAP rekolla informasaun adekuada hosi autoridade suku no lian sira kona-ba prosesu tesi lia tradisionál. Nune’e,  fó biban ba ekipa MRLAP atu dezenvolve ezbosu lei atu bele uniformiza lei tradisionál ho formál.

Reprezentante Prezidente  Autoridade Munisípiu Lautem  atuál Sekretáriu Munisípiu Lautem, Oscar Dias Quintas,    konsidera, konsultasaun ne’e importante tebes, tanba durante lia na’in no autoridade suku sira utiliza lei tradisionál iha komunidade laran liu-liu ba kazu sivíl sira laiha baze legál ba sira.

“Ha’u husu imi autoridade suku, lia nain atu  fó informasaun  prosesu tesi lia tradisionál ne’ebé durante implementa ho didi’ak,” nia hateten.

Ekipa MRLAP rona mós  prosesu tesi lia tradisionál hanesan tara bandu ligasaun ema ho ema, ema ho ambiente, ne’ebé durante ne’e utiliza hodi rezolve konflitu sira iha suku no aldeia laran.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here