Portavós traballadór Agapito Maia. Imajen/Natalino Costa.

DILI, 21 novembru 2019 (TATOLI) – Portavós grupu traballadór Programa Serbisu Sazonál (SWP, sigla inglés), Agapito Lopes Maia, husu deskulpa ba Sekretáriu Estadu Formasaun Profisionál no Empregu (SEFOPE) kona-ba protestu ne’ebé antes ne’e halo ba kazu deskonfia troka ema nia naran atu bá serbisu iha Austrália.

“Ha’u portavós ba grupu ne’ebé halo protesta ho laran tomak husu deskulpa ba institusaun SEFOPE, liuliu ba Diresaun Nasionál Empregu Exteriór no ba nia funsionáriu tomak, ami duun sala funsionáriu maka troka naran kandidatu traballadór nian”, Agapito Lopes Maia liuhosi konferénsia imprensa iha Becora, ohin.

“Maibé buat sira ne’e ladún loos tanba ami ladún hatene ninia faktu loloos, até ami ladún hatene kritéria serbisu nian. Afinál, momentu ne’ebá, ami-nia naran malae rasik maka troka”, rekoñese.

Maibé asaun ne’ebé liu ona, bele enkoraza funsionáriu SEFOPE atubele halo serbisu di’ak liután ho aktu transparente entre kandidatu traballadór ho SEFOPE.

Iha fatin hanesan, Diretór Diresaun Nasionál Empregu Exteriór (DNEE), Filomeno Soares, salienta hahalok sira ne’ebé maka kanditatu traballdór sira halo nu’udar miss communication.

“Sira-nia asaun nu’udar miss communication entre funsionáriu ho traballadór sira tanba ne’e maka ami konvida mídia sira atu esklarese ba públiku katak serbisu iha DNEE ne’e la’o normál”, dehan nia.

Maske nune’e, asaun ne’e mós inspira funsionáriu DNEE, nune’e ba oin funsionáriu sira halo serbisu di’ak liután tanba Governu investe ba programa ne’e atu ajuda timoroan hodi hadi’a ekonomia família nian.

Nia husu ba funsionáriu sira atu serbisu ho profisionalizmu liuhosi tratamentu ne’ebé maka di’ak, nune’e nafatin fó oportunidade ba kandidatu sira ne’ebé maka liu ona prosesu SWP.

Notísia relevante : Laiha SOP Hamosu Irregularidade iha Rekrutamentu Traballadór husi SEFOPE

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here