Imajen/Google.

DILI, 21 novembru 2019 (TATOLI) – Adidu Sekretáriu Estadu Formasaun Profisionál no Empregu (SEFOPE) ba asuntu traballadór iha Austrália, António Armindo, informa SEFOPE kansela traballadora ida nia viajen bá serbisu iha Austrália tanba deteta isin-rua ho fulan-neen ona.

“Ita simu telefone husi Home Affairs Australia, sira telefone mai traballadór na’in-ualu, kompostu husi feto neen no mane rua maka atu bá serbisu iha Austrália iha área ortikultura nian, maibé ohin, entre sira na’in-ualu, iha feto ida maka isin-rua ho fulan-neen, nune’e ami haruka fila kedan bá uma hodi hein tempu seluk”, António Armindo esklarese ba jornalista sira iha Becora, ohin.

Tuir adidu katak ba asuntu traballadór iha Austrália, bainhira feto ida grávida, SEFOPE sei la autoriza atu bá serbisu, maske ajénsia Austrália nian hirus, tanba lakon ona osan ba trata vistu, lakon osan ba billete hosi Timor-Leste bá Darwin no ba Melbourne, más ajénsia konxiente hodi foti fali traballadór hosi nasaun seluk atu substitui.

Situasaun ne’e akontese tanba ajénsia foin fó sira-nia billete ho urjente no la konsege bá halo teste ba isin-rua nian.

“Regulamentu SEFOPE klaru katak teste médiku ba saúde Seasonal Worker Programme (SWP) liuliu atu hatene feto sira grávida ka la’e, ne’e antes loron rua atu arranka, maibé tikete maka ajénsia fó urjente entaun la konsege halo teste”, afirma.

Nia manifesta tristeza katak timoroan bosok SEFOPE bainhira dehan la grávida, finalmente akontese saida maka la espera, maske nune’e, SEFOPE sei bolu atu mai esklarese, nune’e bele selu fali osan billete no vistu nian, tanba se la’e ajénsia bele hakotu kooperasaun ho Governu Timor-Leste.

“Nia sei mai hasoru ita iha ne’e atubele ko’alia oinsá maka nia bele selu fali ajénsia nia osan”, dehan.

Entretantu, traballadora ne’ebé maka gravida ho naran inisiál A nu’udar serbisu-na’in SWP antigu nian ne’ebé hetan tan kontratu husi ajénsia Austrália, Premium Graduate Placements (PGP) husi Mildura iha Melbourne ne’ebé haree liuba ortikultura nian.

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here