Ekipa lojístika Prezidénsia Repúblika hatún karteira husi karreta, ne'ebé atu oferese ba EBC Nahareka. Imajen TATOLI/Cipriano Colo

VIQUEQUE, 21 novembru (TATOLI)–Prezidénsia Repúblika (PR) liuhusi Gabinete Servisu Apoiu Polítka (SAP) no Servisu Peskiza hamutuk ho Universidade Nacional Timor Lorosa’e (UNTL) no mós Ministériu Edukasaun Juventude no Desportu (MEJD) oferese karteira hamutuk 75 ba eskola Ensinu Báziku Sentrál Primeiru no Segundu Síklu Nahareka ho Eskola Bázika Filiál (EBF) sira mak hanesan EBF Osolari, EBF Samanu ho EBF Waibobo, Postu Administrativa Ossu, Munisípiu Viqueque, kinta ne’e.

Iha serimónia entrega, Diretór Jerál Prezidénsia Repúblika, Domingos Romualdo dos Santos Carmo Amaral, hateten karteira sira-ne’e konsege lori mai to’o Nahareka tanba Prezidénsia Repúblika servisu hamutuk ho UNTL no MEJD.

Romualdo esplika, apoiu ne’e bazeia ba pedidu husi eskola ne’e rasik no Prezidénsia Repúblika liuhusi ninia peskiza hatudu katak eskola ne’e merese duni atu hetan karteira nune’e ohin konsege oferese karteira hirak-ne’e.

“Husu inan-aman, profesór no estudante sira atu kuidadu didi’ak kadeira sira-ne’e hodi bele uza ho durasaun tempu naruk, tanba karteira hirak-ne’e mós uza ona durante tempu naruk iha UNTL, inklui Prezidente Repúblika rasik mós frekuenta ninia estudu, tur mós iha karteira hirak ne’e”, nia haktuir.

Romualdo fó hanoin katak apoiu ne’ebé Prezidente Repúblika oferese, la haree ba partidu, grupu ka rasa, maibé nu’udár aman nasaun iha mós responsabilidade atu fó apoiu ba kualker sidadaun ne’ebé presiza apoiu urjente, bazeia ba pedidu.

“Maibé, apoiu ne’e la’ós atu intervein ba knaar ezekutivu sira. Tanba ne’e, atu realiza programa refere, parte Prezidénsia Repúblika sempre koordena ho ministériu relevante sira”, nia hatutan.

Nia mós sita katak antes ne’e oferese ona karteira 150 ba eskola rua iha Munisípiu Covalima, servisu hamutuk ho MEJD.

Nune’e mós, Xefe Gabinete MEJD, Horácio Borges Borromeu husu ba estudante sira atu bele kuidadu didi’ak kadeira hirak-ne’e. Husu mós apoiu husi inan-aman no profesór sira atu tau-matan no kuidadu didi’ak kadeira hirak-ne’e hodi bele uza ba prosesu aprendizajen iha eskola refere.

Kona-ba karteira hirak-ne’e, Diretór Nasionál Planeamentu Finansa UNTL, Herry S. da Costa Magno esplika, kadeira sira-ne’e uzadu, tanba UNTL uza tinan barak nian laran no transfere fali mai eskola Nahareka ne’e atu bele kontinua uza, tanba karteira hirak-ne’e iha kualidade di’ak no ema matenek barak ne’ebé oras ne’e kaer kargu importante iha nasaun ne’e mós tur iha karteira sira-ne’e.

“Husu alin sira atu uza didi’ak karteira hirak-ne’e, nune’e alin sira tuir mai bele uza nafatin”, nia sujere.

Iha fatin hanesan, Xefe Suku Nahareka, Paulino Alberty Ximenes agradese ba Prezidénsia Repúbka ho UNTL no MEJD tanba bele oferese karteira ba eskola ne’e hodi fasilita di’akliutan estudante sira, nu’udar futuru Nahareka no nasaun.

“Ami agradese tanba Estadu hanoin nafatin ami iha área rurál, liuliu Suku Nahareka”, Paulino agradese.

Aleinde ne’e, Diretór Interinu EBC Nahareka, Guido Sequeira agradese tanba Prezidénsia Repúblika la haluha pedidu mobiliáriu ne’ebé antes ne’e parte eskola hato’o.

“Ami agradese tanba Estadu tau-matan nafatin ba ami iha área rurál. Ami-nia pedidu ne’e foin mak hato’o no iha tempu badak nia laran hetan kedas resposta”, nia agradese.

EBC Nahareka iha estudante hamutuk 357 aumenta estudante sira husi eskola filiál sira ho totál alunu 744 no iha profesór hamutuk 33.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here