Estudante Eskola Sekundária Tekniku Vokasionál Teknolojia Industrial Bekora, Dili. Imajen/TATOLI

DILI, 21 novembru 2019 (TATOLI)-Komandu Polisia Nasional Timor-Leste (PNTL) hasai ona ‘orden’  komandu nian hodi husu ba estudante finalista eskola sekundária sira atu la bele halo marxa bainhira simu rezultadu ezame nasionál.

Segundu Komandante Polisia Munisípiu Dili, Superintendente Asistente Polisia, Euclides Belo. Imajen/Eugénio Pereira

Segundu Komandante Munisípiu Dili, Superintendente Xefe, Euclides Belo dehan, razaun polisia bandu estudante finalista sira halo marxa ho karreta no motor hodi evita mosu kazu asidente tráfegu.

Nia dehan, iha sidade Dili sai tiha ona kultura ida tenke prevene, kada tinan, bainhira estudante sira simu rezultadu halo marxa ho motór la uza kapasete, hemu tua lanu la’o kontra regra sinais tránzitu too balun soke ho motór no mate.

Komandu PNTL Dili rasik halo ona koordenasaun ho Diretór Nasionál Ministériu Edukasaun hodi koordena ho diretór eskola hotu iha sidade Dili atu fó hatene ba estudante finalista sira karik simu rezultadu ezame di’ak liu selebra de’it iha eskola no fila ba uma.

“Ami simu ona informasaun husi Gabinete Ministériu Edukasaun katak, bainhira ita nia estudante sira simu no rona rezultadu ezame sira pasa ou la pasa, labele halo marxa,” informa Euclides Belo, ohin, ba jornalista iha Sentru Konvensaun Dili (CCD-sigla portugés).

Polisia Unidade Tránzitu  sei halo operasaun másimu iha eskola hotu inklui estrada públiku sira para kontrola movimentu hotu- hotu.

“Ha’u husu ba estudante sira labele hatudu imi nia jeitu nakar la kumpre regra sinais tránzitu. La rona, ami sei kaptura,”  hateten Euclides Belo.

Estudante Labele Ameasa Profesór

Iha parte seluk, Komandu Polisia Munisípiu Dili mós sei halo seguransa másimu ba iha eskola hotu-hotu baihira fó-sai rezultadu ezame nasionál nian maka estudante balun la liu ka la aprovadu labele halo fali ameasa ataka profesór no profesora sira.

“Se estudante sira rona rezultadu ou simu envelope alin estudante sira pasa ou la pasa realidade ida tenke simu. Agora polisia bandu atu alin estudante ida atu ameasa fali ita nia profesór/a. Se maka ameasa, ami sei kaer,” afirma Euclides Belo.

Polisia apela mós ba inan no aman sira akompaña oan sira ba simu sira nia kaderneta bainhira liu agradese fila ba uma ho kontente, no se maka la liu mós tenke simu konsekuénsia hodi kontribui nafatin ba pás.

Polisia sei asegura seguransa ba eskola  sira hanesan, Sekundáriu Paulo V, Canosa Haslaran Manleuana, Cristal Balidi, 4 Setembru UNAMET Balidi,  Eskola FINANTIL Ai-mutin, 10 Dezembru Comoro no eskola balun tan sei envolve direita autoridade suku, Membru Konsellu Polisiamentu Komunitáriu (KPK).

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here