Primeiru Ministru, Taur Matan Ruak. Imajen Tatoli/António Gonçalves

DILI, 21 novembru 2019 (TATOLI)–Primeiru-Ministru (PM), Taur Matan Ruak, deklara antes atu hakat ba remodelasaun, Governu presiza halo uluk avaliasaun servisu ba membru Governu sira hafoin realiza.

Xefe Governu mós hateten, nia parte nakloke ba opiniaun no krítika hotu, maibé Konstituisaun fó ona kompeténsia tomak ba Governu, Parlamentu Nasionál (PN) no Prezidente Repúblika (PR) hodi kumpre tuir lei ne’ebé iha.

“Ida-ne’e opiniaun ida-ne’ebé la’o, maibé atu hakat ba remodelasaun ita tenke halo avaliasaun uluk tanba ne’e ha’u seidauk ko’alia kona-ba kestaun ne’e”, tenik PM Taur hafoin enkontru semanál ho Prezidente Repúblika, Francisco Guterres Lú Olo iha Palásiu Prezidensiál, Bairro Pité, kinta ne’e.

Iha semana kotuk, Koligasaun Partidária Aliansa Mudansa ba Progresu (AMP) realiza Konferénsia Nasionál daruak no hasai Rezolusaun nú. 2/2019, ne’ebé iha pontu hitu sita aliansa ne’e konsidera nosaun atu halo remodelasaun ba VIII Governu Konstitusionál, hodi responde ba nesesidade dezenvolvimentu nasaun nian, liuliu kontribui ba hadi’a dezempeñu Governu.

Eis Prezidente Repúblika dehan, esforsu ne’ebé Governu sei halo dahuluk maka oinsá membru Governu hirak ne’ebé seidauk hetan pose.

“Ha’u-nia atensaun dahuluk maka membru hirak ne’ebé seidauk hetan pose bele simu ona pose. Prezidente Repúblika hateten mai ha’u dalan di’ak maka diálogu. Ha’u hanesan Primeiru-Ministru apoiu diálogu ne’ebé Prezidente fó sai atu bele buka solusaun”, subliña Taur.

Antes ne’e, Xefe Estadu ko’alia bebeik kona-ba diálogu maibé seidauk akontese to’o agora. Tanba ne’e, PM haklaken, “Diálogu ne’e sei realiza. Ohin la realiza aban sei bele realiza. Aban la realiza bainrua realiza. Maibé, ita presiza presistente”, salienta PM.

Entretantu, membru governu  indijitadu ne’ebé Xefe Estadu seidauk fó pose maka hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Ministru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna-aan ona), António Verdial, Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Enkuantu, Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, PR aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here